لاہور ہائیکورٹ نے چیئرمین تحریک انصاف عمران خان کوپارٹی عہدے سے ہٹانے کی درخواست کے قابل سماعت ہونے پر فیصلہ محفوظ کر لیا۔
لاہور ہائیکورٹ میں چیئرمین تحریک انصاف عمران خان کوپارٹی عہدے سے ہٹانے کی درخواست پر سماعت ہوئی، جسٹس انوار حسین نے سماعت کی، عدالت نے درخواست کے قابل سماعت ہونے سے متعلق فیصلہ محفوظ کرلیا۔
درخواست گزار آفاق احمد کے وکیل نے دلائل دیے، جسٹس انوار حسین نے درخواست گزار کے وکیل سے مکالمہ کیا کہ پارٹی سربراہی سے ہٹانے کے معاملے میں آپ کس طرح سے متاثرہ فریق ہیں؟
درخواست گزار نے مؤقف اپنایا کہ پہلے عدالت یہ فیصلہ کرے کہ معاملہ سنگل بنچ نے سماعت کرناہے یا لارجر بنچ نے، الیکشن کمیشن عمران خان کو این اے 95 میانوالی سے نااہل قرار دے چکا ہے۔
درخواست گزار کے مطابق الیکشن کمیشن نے 7 دسمبر 2022 کو عمران خان کے خلاف قانونی کارروائی کا آغاز کیا، توشہ خانہ کےحقائق چھپانے پر الیکشن کمیشن نے 21 اکتوبر 2022 کو عمران خان کو نااہل قرار دیا تھا۔
درخواست گزار کا مؤقف ہے کہ اس سے قبل نواز شریف کو بھی عدالت نااہل کر چکی ہے، جس کے بعد نواز شریف پارٹی صدر نہیں رہے، نااہلی کے بعد کوئی پارٹی سربراہ نہیں رہ سکتا۔
درخواست گزار نے عدالت سے استدعا کی کہ انہوں نے عمران خان کو پارٹی عہدے سے ہٹانے کے لیےالیکشن کمیشن سے رجوع کیا مگر اس درخواست پر کوئی کارروائی نہیں کی گئی، عدالت عمران خان کو چیئرمین تحریک انصاف کے عہدے سے ہٹانے کا حکم دے۔
عدالت نے عمران خان تحریک انصاف کے چیئرمین کے عہدے سے ہٹانے کے حوالے سے فیصلہ محفوظ کر لیا۔
