وزیراعظم شہباز شریف 31 اکتوبر کو قطر کے ایک روزہ دورے پر روانہ ہوں گے۔
سفارتی ذرائع کے مطابق، شہباز شریف قطر کا دورہ امیر قطر تمیم بن حمد الثانی کی دعوت پر کررہے ہیں۔ اس دورے میں شہباز شریف دوحہ میں پاکستانی نوادرات، آرٹس و کلچر کی نمائش کا افتتاح کریں گے۔
یہ بھی پڑھیں: پاکستان قطر کے ساتھ اپنے برادرانہ تعلقات کو بہت اہمیت دیتا ہے، وزیر اعظم
سفارتی ذرائع کا کہنا ہے کہ وزیراعظم شہباز شریف اپنے دورے کے دوران امیر قطر اور اعلیٰ قطری قیادت سے ملاقاتیں بھی کریں گے اور ان کے ساتھ دوطرفہ تعلقات کے فروغ پر تبادلہ خیال کریں گے۔
ذرائع نے مزید بتایا کہ وزیراعظم کے دورے کے دوران خاص طور پر قطری سرمایہ کاروں اور کاروباری شخصیات کو پاکستان میں سرمایہ کاری کے لیے دی گئی ترغیبات اور مواقع کا جائزہ لیا جائے گا۔
