چیف الیکشن کمشنر سکندر سلطان راجہ نے چیئرمین سینیٹ صادق سنجرانی اور اسپیکر قومی اسمبلی راجا پرویز اشرف کو الیکشن ایکٹ میں ترامیم سے متعلق ایک خط لکھا ہے جس میں چیف الیکشن کمشنر نے الیکشن ایکٹ کی سیکشن 57 ون اور 58 میں ترامیم تجویز کی ہیں۔خط میں مطالبہ کیا گیا ہے کہ ترامیم پارلیمنٹ کے سامنے منظوری کے لیے پیش کی جائیں۔
سکندر سلطان راجا نے 57 ون میں ترمیم تجویز کی ہے کہ الیکشن کمیشن ہی عام انتخابات کی تاریخ یا تاریخوں کا اعلان کرے گا۔ ترمیم کے تحت الیکشن کمیشن حلقوں سے نمائندے منتخب کرنے کو کہے گا۔
تجویز کیا گیا ہے کہ الیکشن کمیشن انتخابات نوٹیفیکشن کے بعد الیکشن پروگرام میں تبدیلی کر سکے گا۔ مجوزہ ترمیم کے مطابق الیکشن کمیشن نئی پولنگ تاریخ کے ساتھ نیا الیکشن پروگرام بھی جاری کر سکے گا۔
خط میں کہا گیا ہے کہ پنجاب اور خیبرپختونخوا اسمبلی کے انتخابات کے انعقاد پر تنازع پیدا ہوا۔ عدلیہ نے آرٹیکل 224/2 کی تشریح میں کہا ہے کہ 90 دنوں میں الیکشن آئینی طور پر ضروری ہے۔
