بالی ووڈ سپراسٹار خوانین میں سلمان خان کے علاوہ اب شاہ رخ خان کو بھی قتل کی دھمکیاں موصول ہونے کا سلسلہ جاری ہے۔
بھارتی میڈیا کے مطابق بالی ووڈ اداکار شاہ رخ خان کو دھمکی آمیز کال موصول ہونے کے بعد ممبئی پولیس نے مقدمہ درج کر لیا ہے۔
ممبئی میں شاہ رخ خان کے پروڈکشن ہاؤس کو کال موصول ہوئی جس میں انہیں جان سے مار نے کی دھمکی دی گئی۔
آنے والی فون کال جس نمبر سے آئی وہ چھتیس گڑھ کے علاقے رائے پور میں فیضان کے نام سے رجسٹرڈ اور فعال ہے۔
یہ بھی پڑھیں: ’معافی مانگو یا 5 کروڑ دو، ورنہ مار ڈالیں گے‘ سلمان خان کو ایک بار پھر دھمکی موصول
شاہ رخ خان کی ٹیم نے اس حوالے سے ممبئی پولیس باندرہ اسٹیشن میں مقدمہ درج کرادیا ہے۔ پولیس کے مطابق رائے پور رہائشی فیضان نامی نوجوان نے مبینہ طور پر 50 لاکھ روپے تاوان کا مطالبہ کیا۔
یہ کال 5 نومبر کو بھارتی وقت کے مطابق دن کے ایک بجکر 20 منٹ پر کی گئی تھی اور اس کی لوکیشن ایک فعال فون نمبر کے ذریعے ٹریس کی گئی تھی۔
واقعے کے بعد ممبئی پولیس کی ایک ٹیم کو مزید تحقیقات کے لیے رائے پور روانہ کیا گیا۔ بھارتی میڈیا کے مطابق فون کرنے والے نے تاوان ادا نہ کرنے پر شاہ رخ خان کو نقصان پہنچانے کی دھمکی دی۔
مزید پڑھیے: شاہ رخ خان شادی کی پہلی رات پھوٹ پھوٹ کر کیوں روئے تھے؟
گزشتہ سال اکتوبر میں بالی ووڈ بادشاہ شاہ رخ خان کو ان کی فلموں پٹھان اور جوان کی کامیابی کے بعد جان سے مارنے کی دھمکی ملی جس کی وجہ سے ممبئی پولیس نے ان کی سیکیورٹی کو بڑھا دی تھی۔
واضح رہے کہ اس سے قبل بالی وڈ کے سپراسٹار سلمان خان کو بھی قتل کی دھمکیاں موصول ہو چکی ہیں۔
