پنجاب پولیس کو کچے کے علاقے میں ڈاکوؤں کے خلاف اہم کامیابی حاصل ہوئی ہے، لنڈ گینگ کا سرغنہ پولیس مقابلے میں مارا گیا۔
ترجمان نے بتایا کہ رحیم یار خان اور راجن پور کی پولیس نے کچہ بنگلہ اچھا میں مشترکہ کارروائی کی، کارروائی میں کچے کے علاقے میں سرگرم لنڈ گینگ کا سرغنہ شاہد لنڈ مارا گیا۔
یہ بھی پڑھیں: شکار پور: کچے کے ڈاکوؤں نے فائرنگ کرکے ایس ایچ او کو شہید کردیا
حکومت پنجاب نے ڈاکو شاہد لنڈ کے سر کی قیمت ایک کروڑ روپے مقرر کر رکھی تھی۔ترجمان پولیس نے بتایا کہ ہلاک ڈاکو 28 سے زائد سنگین مقدمات میں پولیس کو مطلوب اور اشتہاری تھا، اس کے خلاف رحیم یار خان اور راجن پور کے مختلف تھانوں میں مقدمات درج تھے، رحیم یار خان اور راجن پور پولیس گزشتہ 02 ماہ سے اس آپریشن کی تکمیل لیے کام کر رہی تھی۔
ترجمان کے مطابق آئی جی پنجاب نے کامیاب کارروائی پر رحیم یار خان اور راجن پور پولیس کو شاباش دیتے ہوئے کہا ہے کہ کچے کے ایریا سے دہشتگردوں، ڈاکوؤں اور شر پسند عناصر کے خاتمے کا مشن ضرور کامیاب ہوگا۔
یہ بھی پڑھیں: رحیم یار خان: کچے میں ایک اور پولیس آپریشن میں 2 ڈاکو ہلاک
واضح رہے کہ 24 اگست کو حکومت پنجاب نے سندھ اور پنجاب کے کچے کے بڑے علاقے میں کارروائی کرنے والے خطرناک ڈاکوؤں کے سر کی مقررہ قیمت 10 لاکھ سے بڑھا کر ایک کروڑ روپے کردی تھی۔
ترجمان محکمہ داخلہ پنجاب کی جانب سے جاری بیان میں کہا گیا تھا کہ شاہد، مجیب، وہابہ، غنی بخش احمر عرف شوبی، احمد، عطااللہ، سبزعلی، قبول مطلوب ڈاکو ہیں، مطلوب ڈاکوں میں میرا، دریجن، گورا، ثنا اللہ، تنویر اور راہب شر شامل ہیں۔
