بلوچستان کے وزیر داخلہ ضیاء اللہ لانگو نے کہا ہے کہ دہشت گردوں کے حملوں کو ناکام بنانے کے لیے سیکیورٹی فورسز کو مزید متحرک کیا جائے گا۔
امن وامان کی صورت حال کے حوالے سے منعقدہ اجلاس سے خطاب کرتے ہوئے ضیاء اللہ لانگوکا کہنا تھا کہ صوبائی حکومت دہشت گردی کی روک تھام کے لیے ترجیحی بنیادوں پر اقدامات کرے گی اور پولیس اہلکاروں کو حملوں سے محفوظ رکھنے کے لیے جدید آلات فراہم کیے جائیں گے۔
صوبائی وزیر داخلہ ضیاء اللہ لانگو کی زیر صدارت امن و امان کی صورتحال کے حوالے سے ایک اجلاس منعقد ہوا جس میں ایڈیشنل چیف سیکریٹری داخلہ اور ایڈیشنل آئی جی پولیس بھی شریک ہوئے۔ اجلاس کو دہشت گردی کے واقعات کی روک تھام کے لیے قانون نافذ کرنے والے اداروں کے اقدامات سے آگاہ کیا گیا۔
اجلاس کو بریفنگ دی گئی کہ گزشتہ 2 روز میں صوبےمیں دہشت گردی کے 4 واقعات ہوئے جن میں زیادہ تر قانون نافذ کرنے والے اداروں کو نشانہ بنایا گیا جس میں پولیس کی بروقت کارروائی سے دہشت گردی کے کئی منصوبوں کو ناکام بھی بنایا گیا۔