پاکستان میں ایران کے سفیر سید محمد علی حسینی نے کہا ہے کہ فلسطینی مسلمانوں کو اپنی سرزمین پر پُر امن زندگی گزارنے کا حق حاصل ہے۔ اسرائیل سمیت کسی طاقتور کو یہ حق نہیں کہ وہ مظلوم فلسطینیوں پر ظلم کے پہاڑ توڑے۔ امت کا اتحاد ہی مسئلہ فلسطین کا واحد حل ہے۔
ان خیالات کا اظہار انہوں نے نیشنل پریس کلب اسلام آباد اور ثقافتی قونصلیٹ سفارتخانہ ایران کے باہمی اشتراک سے فلسطین کے مظلوم عوام سے اظہار یکجہتی کے لیے بین الاقوامی یوم القدس کانفرنس سے خطاب کرتے ہوئے کیا۔ ایرانی سفیر نے کہا کہ ’اسلام ایک دوسرے کے حقوق کا احترام پیار و محبت کا پیغام دیتا ہے۔ انسانیت کا احترام صرف اسلام میں پایا جاتا ہے‘۔
ثقافتی قونصلر سفارتخانہ اسلامی جمہوریہ ایران آقائے احسان خزاعی نے کہا کہ یوم قدس حق اور باطل کے درمیان جنگ اور ناانصافی کے خلاف انصاف کی صف بندی کو ظاہر کرتا ہے۔ اسرائیل کی غاصب حکومت دوسرے ممالک سے تعلقات استوار کرنے کی کوشش کر رہی ہے تاہم پاکستان اور ایران میں اس طرح کی کانفرنسز کا انعقاد یہ ظاہر کرتا ہے کہ ظالم صہیونی حکومت کی اس خطے میں کوئی جگہ نہیں ہے۔ انہوں نے کہا کہ امت مسلمہ کے لیے ضروری ہے کہ وہ امریکی اور اسرائیلی سازشی منصوبے کے خلاف چوکنا رہیں۔
اس موقع پر مقررین نے کہا کہ مسئلہ فلسطین اور کشمیر کے حل کے لیے اسلامی ممالک کی کانفرنس بلائی جائے۔ اسرائیلی مظالم کو دنیا کے سامنے لانے کے لیے انہیں اجاگر کرنے کی ضرورت ہے۔ ظلم کا تذکرہ ہونا چاہیئے کیونکہ ظلم کو بیان نہ کرنا ظالم کا ساتھ دینے کے مترادف ہے۔
مقررین نے کہا کہ امت کے دیرینہ مسئلہ کی طرف دنیا کی توجہ مبذول کروانے کے لیے رمضان المبارک کے آخری جمعہ کو یوم القدس قرار دیا گیا۔ قائد اعظم نے بھی فلسطین کے مظلوم عوام کے ساتھ اظہار یکجہتی کیا۔ قائد اعظم محمد علی جناح نے فلسطین کے لیے پہلا فنڈ بھی قائم کیا۔ تقریب سے ناصر عباس شیرازی، عارف حسین واحدی، صدر این پی سی انور رضا، علی رضا علوی اور دیگر مقررین نے بھی خطاب کیا۔
