سابق ہیوی ویٹ چیمپئن مائیک ٹائی سن 19 برس بعد رنگ میں اترے اور پہلی ہی فائٹ میں شکست کھا گئے۔ 58 سالہ مائیک ٹائی سن کا مقابلہ اپنی عمر سے 31 برس چھوٹے باکسر جیک پال سے تھا۔ فائٹ کا فیصلہ پوائنٹس کی بنیاد پر ہوا۔
ٹیکساس کے باکسنگ ارینا میں ہونے والے مقابلے میں جیک پال نے سابق عالمی ہیوی ویٹ چیمپئن مائیک ٹائی سن کو شکست دی۔ فائٹ کا فیصلہ پوائنٹس کی بنیاد پر جیک پال کے حق میں ہوا، 8 راؤنڈ کے مقابلے میں تینوں ججوں نے جیک پال کو فاتح قرار دیا۔
مزید پڑھیں:مائیک ٹائیسن نے جیک پال کے ساتھ باکسنگ فائٹ سے قبل چونکا دینے والا اعلان کردیا
غیر ملکی میڈیا کا کہنا ہے کہ 27 سالہ جیک پال امریکی اداکار اور یوٹیوبر بھی ہیں جبکہ اس میچ میں مائیک ٹائیسن تھوڑے سست دکھائی دیے۔ اے ٹی اینڈ ٹی اسٹیڈیم میں 70 ہزار تماشائی میچ کو دیکھنے کے لیے موجود تھے جبکہ نیٹ فلیکس پر 85 ہزار سے زائد شائقین نے اس میچ کو براہ راست دیکھا۔
یاد رہے کہ یہ فائٹ رواں برس جولائی میں شیڈول تھی جو مائیک ٹائسن کی طبیعت کی خرابی کی وجہ سے ملتوی کر دی گئی تھی۔ مائیک ٹائیسن 2005 میں کیون مکبرائیڈ سے شکست کے بعد باکسنگ سے ریٹائر ہو گئے تھے۔
مائیک ٹائیسن نے اپنے کیریئر میں 50 مقابلے جیتے ہیں جن میں سے 44 جیتے ہوئے مقابلے ناک آؤٹ تھے۔ ان کے حریف جیک پال نے 10 مقابلوں میں حصہ لیا جن میں سے 7 فتوحات ناک آؤٹ تھیں، تاہم انہوں نے یہ تمام مقابلے غیر مقبول حریفوں سے جیتے ہیں۔
