پاکستان انٹرنیشنل اسکول (انگلش سیکشن) ریاض سعودی عرب کے ہونہار طلبا و طالبات نے برٹش کونسل کی زیر نگرانی اے لیول ایڈیکسل کے امتحان میں 16 نمایاں پوزیشنیں حاصل کرلیں۔
پوزیشنیں حاصل کرنے والے طلبا میں سے محمد عفان کاشف، محمد ابوبکر صدیق اور سعد احمد ریاضی میں دنیا بھر میں اول آئے۔
اس کے علاوہ انگلش کے مضمون میں 3 طالبات بشریٰ بنت خالد، غانیہ جواد اور زارا زبیر نے دنیا بھرمیں پہلی پوزیشن حاصل کی۔
سعد احمد نے فزکس اور محمد ریان نے کیمسٹری میں سعودی عرب میں پہلی پوزیشن حاصل کی۔ لُبابہ عبدالغفار نے مشرق وسطیٰ اور سعودی عرب میں بزنس اسٹڈیز میں پہلی پوزیشن اپنے نام کی۔
اس کے علاوہ سعد احمد نے اے لیول میں تین اے اسٹار لے کر مشرق وسطیٰ اور سعودی عرب میں دوسری پوزیشن حاصل کی۔
اے ایس میں تین اے سٹار لے کر محمد حمدان جواد نے سینٹرل ریجن میں دوسری پوزیشن حاصل کی، سید محمد عبداللہ امجد نے اے لیول میں تین اے سٹار لے کر سینٹرل ریجن میں تیسری پوزیشن اپنے نام کی۔
اے ایس میں سب سے زیادہ نمبر لینے کا ریکارڈ رجل کبیر نے اپنے نام کیا۔
طلبا و طالبات نے اپنی کامیابی کو والدین کی دعاؤں اور اساتذہ کی بھرپور محنت و اسکول انتظامیہ کی بہترین تعلیمی پالیسی کا نتیجہ قرار دیا۔
پاکستانی کیمونٹی اور والدین نے اس شاندار کامیابی پر اسکول پرنسپل اور اسکول کوآرڈینیٹر ندیم اقبال اعوان اور ٹیچر سمیرا وسیم سمیت دیگر اساتذہ کو مبارکباد پیش کی اور ان کی لگن کو سراہا۔
اسکول کے پرنسپل محمد تنویر نے تمام کمیونٹی، والدین، اسکول مینجمنٹ کونسل اور اساتذہ کو مبارکباد دی اور اللہ کا شکر ادا کیاکہ ان کی محنت نے ان کو سرخرو کیا ہے۔
انہوں نے حالیہ نتائج کو دیار غیر میں رہنے والوں کے لیے فخر اور اثاثہ قرار دیا۔ پرنسپل کی جانب سے طلبا و طالبات کی محنت اور لگن کو سراہا گیا اور ان کے روشن مستقبل کے لیے نیک خواہشات کا اظہار بھی کیا گیا۔
