تحریک انصاف کے رہنما فواد چوہدری نے وزیراعظم شہباز شریف کے خلاف سپریم کورٹ میں درخواست دائر کر دی۔
درخواست میں فواد چوہدری نے سابق وزیراعظم نواز شریف کے بیرون ملک جانے کے خلاف لاہور ہائیکورٹ میں جاری کیس میں فریق بننے کی استدعا بھی کی ہے۔
فواد چوہدری نے درخواست میں مؤقف اختیار کیا ہے کہ وزیراعظم شہباز شریف سابق وزیراعظم نواز شریف کی خرابی صحت کے باعث بیرون ملک جانے کے ضامن تھے، نواز شریف مفرور مجرم ہیں۔
فواد چوہدری کے مطابق شہباز شریف کو ضامن کے طور پر نواز شریف کو ملک واپس لانا تھا لیکن انہوں نے سفارتی پاسپورٹ جاری کر دیا، لاہور ہائیکورٹ نے کیس میں فریق بننے کی میری درخواست مسترد کی۔
فواد چوہدری نے سپریم کورٹ میں استدعا کی ہے کہ لاہور ہائیکورٹ کو حکم دیا جائے کہ سابق وزیر اعظم نواز شریف کے بیرون ملک جانے کے اجازت کیس میں مجھے فریق بنایا جائے، درخواست میں وزیراعظم شہباز شریف اور ریاست کو فریق بنایا گیا ہے۔
