ملتان کے نشتر اسپتال میں ڈاکٹروں اور متعلقہ عملے کی مبینہ غفلت کے نتیجے میں دوسرے مریضوں میں ایڈز پھیلنے کے واقعہ کا نوٹس لیتے ہوئے وزیراعلیٰ پنجاب نے ایم ایس سمیت ڈاکٹر اور ہیڈنرس کو معطل کر دیا ہے۔
وزیر اعلیٰ مریم نواز شریف نے نشتر اسپتال جاکر ڈائیلسز مریضوں میں ایڈز پھیلنے کے واقعہ کی خود جانچ پڑتال کی۔ جہاں انہوں نے ڈائیلسز کے دوران ایڈز پھیلنے پر ایم ایس سمیت ڈاکٹر اور ہیڈنرس معطل ،سیکرٹری ہیلتھ کو رپورٹ کرنے کی ہدایت کی۔
پیشہ ورانہ فرائض میں مبینہ غفلت کے مرتکب بعد معطل کیے جانے والوں میں نشتر ہسپتال کے میڈیکل سپرنٹنڈنٹ ڈاکٹر محمد کاظم، نشتر میڈیکل یونیورسٹی نیفرالوجی کے ہیڈ آف ڈیپارٹمنٹ ڈاکٹر غلام عباس، نیفرالوجی ڈیپارٹمنٹ نشتر ہسپتال کی ایسوسی ایٹ پروفیسر ڈاکٹر پونم خالد، نیفرالوجی ڈیپارٹمنٹ نشتر ہسپتال کے سینیئر رجسٹرار ڈاکٹر محمد قدیر، ڈاکٹر ملیحہ جوہر، نیفرالوجی وارڈ کے ایم او ڈاکٹر محمد عالمگیر اور ہیڈ نرس ناہید پروین شامل ہیں۔
وزیر اعلیٰ مریم نواز شریف نے نشتر ہسپتال جاکر ڈائیلسز مریضوں میں ایڈز پھیلنے کے واقعہ کی خود جانچ پڑتال کی، جہاں انہوں نے نشتر ہسپتال کے وائس چانسلر، پرنسپل، ہیڈ آف ڈیپارٹمنٹ، اسسٹنٹ پروفیسر، ہیڈ ایڈز کنٹرول پروگرام اور دیگر کا موقف سنا۔
ایڈز پھیلنے کے اس واقعہ سے متعلق ہونے والی انکوائری رپورٹ کے مطابق ایڈز، ہیپاٹائٹس کے ہر 3 ماہ بعد لازمی ٹیسٹ کے ایس او پیز کی خلاف ورزی کی گئی۔
انکوائری رپورٹ کے مطابق پروٹوکول کے برعکس پرائیویٹ لیبارٹریز سے ایڈز ٹیسٹ کرائے گئے، ایڈز ثابت ہونے کے باوجود وارڈ کے ڈاکٹر اور اسٹاف نے واقعہ چھپانے کی کوشش کی۔
انکوائری رپورٹ میں انکشاف ہوا ہے کہ ڈسپوزیبل ڈائیلسز کٹ اور ڈائی لائیزر کو مختلف مریضوں کے لیے بار بار استعمال کیے گئے، جبکہ ہیڈ آف ڈیپارٹمنٹ اور سینیئر ڈاکٹر کے کئی کئی ہفتے وارڈ کا وزٹ ہی نہیں کیا تھا۔
وزیراعلیٰ نے انکوائری رپورٹ سامنے آنے کے بعد سیکرٹری صحت کو پیدا ایکٹ کے تحت سخت کارروائی کی ہدایت اور ڈاکٹروں کوایڈز سے متاثرہ مریضوں کو ہرجانہ ادا کرنے کا حکم دیا۔
اس موقع پر وزیراعلیٰ پنجاب مریم نواز کا کہنا تھا کہ ایڈز پھیلنے کے واقعہ میں مجرمانہ غفلت برتی گئی۔ سارے وسائل ہیلتھ کے وقف کر دئے لیکن رزلٹ مثبت نہیں۔
انہوں نے کہا کہ علاج کے لیے آنے والےلوگ سرکاری ہسپتال سے ایڈز لیکر جائیں، قطعاً برداشت نہیں۔انہوں کا کہنا تھا کہ استعما ل شدہ سرنجیں ایڈز پھیلنے کی سب سے بڑی وجہ ہے۔
اس موقع پر وزیر اعلیٰ مریم نواز شریف کی ملتان میں پیٹ اسکین فوری طور پر فراہم کرنے کی ہدایت کی، انہوں نے وزیر اعلیٰ مریم نواز شریف نے امراض دل اور دیگر وارڈ کا معائنہ بھی کیا۔
