لاہور کی انسدادِ دہشتگردی کی عدالت نے جناح ہاؤس کے مقدمے میں بانی پی ٹی آئی کی ضمانت خارج کرنے کا تحریری فیصلہ جاری کردیا ہے۔ جج منظر علی گل نے جناح ہاؤس کے مقدمے میں 7 صفحات پر مشتمل تحریری فیصلہ جاری کیا ہے۔
عدالت نے تحریری فیصلے میں کہا ہے کہ بانی پی ٹی آئی عام آدمی نہیں ہیں، ان کا بیان اپنے ورکرز اور سپورٹرز کے لیے اہمیت رکھتا ہے۔ پارٹی کی دوسری قیادت چیئرمین یا بانی کا بیان مسترد کرنے کا سوچ نہیں سکتی، پولیس کے مطابق اسی روز درجنوں جلاؤ گھیراؤ کے واقعات ہوئے۔
مزید پڑھیں: عمران خان کی جناح ہاؤس سمیت 8 مقدمات میں ضمانت کی درخواستیں مسترد
عدالت نے قرار دیا کہ مظاہرین نے صرف فوجی تنصیبات، سرکاری اداروں اور پولیس اہلکاروں پر حملے کیے، کسی پرائیویٹ املاک کو نقصان نہیں پہچایا گیا۔ پراسیکیوشن کے مطابق سازش درخواست گزار کی زمان پارک رہائشگاہ سے کی گئی، عدالت کو بانی پی ٹی آئی کو ضمانت دینے کا کوئی جواز نہیں ملا۔
واضح رہے کہ 27 نومبر کو پاکستان تحریکِ انصاف (پی ٹی آئی) کے بانئ کی 8 مقدمات میں ضمانت کی درخواستیں مسترد کردی گئی تھیں۔ انسدادِ دہشتگردی کی عدالت نے جناح ہاؤس سمیت 8 مقدمات میں بانی پی ٹی آئی کی ضمانت کی درخواستیں مسترد کی تھیں۔ بانی پی ٹی آئی نے عسکری ٹاور حملہ، شادمان تھانے کو جلانے سمیت دیگر 8 مقدمات میں ضمانت کی درخواستیں دائر کی تھیں۔
