کراچی کے علاقے اورنگی مومن آباد میں جائیداد کے لالچ پر ماں کو قتل کرنے والے بیٹے کو گرفتار کرلیا گیا ہے۔ ملزم نے پولیس کو بیان ریکارڈ کرواتے ہوئے اعتراف کیا کہ قتل میں اس کے ساتھ ماموں اور اس کا بیٹا بھی شامل ہیں۔
ملزم نے پولیس کو بتایا کہ واردات کے وقت بہن کو کمرے میں بند کردیا تھا جبکہ 2 چھوٹے بھائیوں کو گھر سے باہر بھیج دیا تھا، جس کے بعد رومال سے ماں کے گلے کو دبایا اور قتل کردیا تھا۔
یاد رہے کہ 2 روز قبل کراچی کے علاقے اورنگی ٹاؤن فقیر کالونی میں 2 سگے بیٹوں نے جائیداد کے لالچ میں اپنی حقیقی ماں کو گلا گھونٹ کر قتل کردیا تھا اور فرار ہو گئے تھے۔
مزید پڑھیں: کراچی: جائیداد کے لالچ میں سگے بیٹوں نے ماں کو قتل کردیا
مومن آباد تھانے کے علاقے اورنگی ٹاؤن فقیر کالونی پریشان چوک کے قریب گھر سے خاتون کی تشدد زدہ لاش کی اطلاع ملنے پر پولیس موقع پر پہنچی تھی اور لاش کو عباسی شہید اسپتال منتقل کیا تھا، جہاں مقتولہ کی شناخت 40 سالہ عزت پری زوجہ میر زادہ کے نام سے کی گئی تھی۔
ایس ایچ او مومن آباد شہباز یوسف کے مطابق مقتولہ 5 بیٹوں اور 3 بیٹیوں کی ماں تھی اور 5 ماہ قبل مقتولہ کے شوہر میرزادہ کا انتقال ہوگیا تھا۔ جس کے بعد گھر میں جائیداد کے تنازع پر جھگڑے شروع ہو گئے تھے۔
مزید پڑھیں: کوئٹہ میں گھریلو ناچاقی پر ماں نے 4 بیٹیوں کو قتل کرکے خودکشی کرلی
جمعرات کی صبح قریباً ساڑھے 8 بجے کے قریب مقتولہ کے سگے بیٹوں خلیل اور مختیار نے اپنے چھوٹے بہن بھائیوں کو گھر سے باہر بھیجا اور اپنی ماں کا گلا گھونٹا اور قتل کردیا۔ دونوں بھائی سگی ماں کو قتل کرنے کے بعد موقع سے فرار ہو گئے تھے۔
مقتولہ خاتون کا آبائی تعلق کے پی کے سے تھا۔ پولیس نے جائے وقوعہ سے خاتون کے قتل میں استعمال کی جانے والی اشیا اور دیگر واقعاتی شواہد کی روشنی میں خاتون کے قتل میں ملوث اس کے سگے بیٹوں کی تلاش شروع کردی تھی۔
