بلوچستان کے صوبائی دارالحکومت کوئٹہ میں دل دہلا دینے والا واقعہ رونما ہوا ہے۔
پیر کی صبح شہر کے نواحی علاقے ہزارہ ٹاؤن کے سردار موسیٰ روڈ پر واقع ایک گھر سے ماں اور 4 بچیوں کی لاشیں برآمد ہوئیں۔
پولیس کے مطابق خاتون نے گھریلو ناچاقی پر پہلے اپنی 4 بچیوں کو زہر دے کر قتل کیا اور بعد میں خود بھی زہر کھا کر خودکشی کرلی۔
اطلاع ملنے پر پولیس نے موقع پر پہنچ کر لاشیں بولان میڈیکل کمپلیکس منتقل کیں جہاں ایک بچی میں سانس ابھی چل رہی تھی جسے فوری طور پر وینٹی لیٹر پر منتقل کیا گیا مگر وہ جانبر نہ ہو سکی۔
مرنے والی بچیوں کی عمریں 3 سے 10 سال کے درمیان بتائی گئی ہیں۔
پولیس کے مطابق بظاہر یہ واقعہ مبینہ طور پر گھریلو ناچاقی پر خودکشی کا لگ رہا ہے مگر پولیس جدید ٹیکنالوجی اور موقع کے شواہد اکٹھے کر کے تفتیش کو آگے بڑھائے گی۔
پولیس نے مقتولہ کے شوہر کو حراست میں لے رکھا ہے جبکہ تفتیش کا سلسلہ جاری ہے۔
