ہمیں نئے اور پرانے پاکستان کو چھوڑ کر ’ہمارے پاکستان‘ کی بات کرنی چاہیے: آرمی چیف کا اِن کیمرا اجلاس سے خطاب

 قومی اسمبلی کے ان کیمرہ اجلاس میں آرمی چیف جنرل عاصم منیر نے کہا کہ ہمیں  نئے اور پرانے پاکستان کی بحث کو چھوڑ کر ’ہمارے پاکستان‘ کی بات کرنی چاہیے۔

اسپیکر قومی اسمبلی کی صدارت میں ہونے والے اجلاس میں وزیراعظم شہبازشریف، آرمی چیف اور دیگر عسکری حکام شریک ہوئے۔

’عوام کے منتخب  نمائندے منزل کا تعین کریں‘

آرمی چیف نے کہا کہ عوام کے منتخب  نمائندے منزل کا تعین کریں، پاک فوج پاکستان کی ترقی اور کامیابی کے سفر میں انکا بھرپور ساتھ دےگی۔

ذرائع کے مطابق اجلاس میں آرمی چیف نے 1973 کے آئین کے نفاذ کے 50 سال مکمل ہونے پر پارلیمنٹ اور ارکان کو مبارک باد دی ہے۔

’سینٹر آف گریویٹی پاکستان کے عوام ہیں‘

اس موقع پر آرمی چیف نے کہا کہ ‏سینٹر آف گریویٹی پاکستان کے عوام ہیں اور آئین پاکستان اور پارلیمنٹ عوام کی رائے کا مظہر ہیں۔

آرمی چیف نے کہا کہ عوام اپنی رائے آئین اور پارلیمنٹ کے ذریعے استعمال کرتے ہیں۔ انہوں نے کہا کہ حاکمیت اعلیٰ اللہ تعالی کی ہے اس کے حکم ہی سے آئین کو اختیار ملا ہے۔

’اختیار عوام کے منتخب نمائندوں کے ذریعے استعمال ہوگا‘

آرمی چیف نے کہا کہ آئین کہتا ہے کہ اختیار عوام کے منتخب نمائندوں کے ذریعے استعمال ہوگا۔ پاکستان کے پاس وسائل اور افرادی قوت کی کوئی کمی نہیں ہے۔

 اراکین قومی اسمبلی نے ڈیسک بجا کر اور تالیوں سے آرمی چیف کے خیالات کا خیر مقدم کیا اور خراج تحسین پیش کیا گیا۔

اجلاس میں وزیر اعظم شہباز شریف نے فوج، رینجرز، پولیس سمیت قانون نافذ کرنے والے اداروں کے افسروں اور جوانوں کو خراج تحسین پیش کرتے ہوئے کہا کہ پاکستان نے دہشتگردی کے خلاف جدوجہد میں 80 ہزار سے زائد قربانیاں دی ہیں۔

’ملک میں دہشت گردی واپس کیوں آئی اور اسے کون لایا؟‘

ذرائع کے مطابق وزیر اعظم نے کہا کہ ہمارے شہدا کی عظیم قربانیوں سے امن بحال ہوا لیکن یہ محنت چار سال میں ضائع کر دی گئی۔

شہباز شریف نے اجلاس میں سوال اٹھایا کہ ملک میں دہشت گردی واپس کیوں آئی اور اسے کون لایا؟

تمام صوبوں نے دہشت گردی کے خاتمے اور فاٹا اصلاحات کے تحت مقاصد کے لئے رقوم دی تھیں، وہ کہاں گئیں؟

وزیر اعظم نے سوال کیا کہ خیبرپختونخوا کو دیئے جانے والے اربوں روپے کے وسائل آخر کہاں استعمال ہوئے؟ ان کا جواب لینا ہوگا۔

 واضح رہے کہ پارلیمنٹ میں قومی سلامتی کمیٹی کا ان کیمرہ اجلاس جاری ہے۔ اجلاس کی صدارت اسپیکر قومی اسمبلی راجا پرویز اشرف کر رہے ہیں۔ اجلاس میں سول اور عسکری قیادت شریک ہے۔

آج نماز جمعہ کے بعد شروع ہونے والے اجلاس میں جب چیف آف آرمی سٹاف جنرل عاصم منیر ایوان میں داخل ہوئے تو ان کی آمد پر اراکینِ پارلیمنٹ نے ان کا ڈیسک بجا کر استقبال کیا۔ اجلاس میں ڈی جی آئی ایس آئی جنرل ندیم انجم بھی شریک ہیں۔

وزیراعظم محمد شہباز شریف نے قومی سلامتی کمیٹی کے اجلاس سے خطاب کرتے ہوئے کہا ہے’ میں افواجِ پاکستان کے شہداء کو سلام پیش کرتا ہوں۔‘

قومی سلامتی کمیٹی کے ان کیمرہ اجلاس میں عسکری حکام کی جانب سے قومی سلامتی کی موجودہ صورتحال پر ان کیمرہ بریفنگ دی جائے گی۔

ذرائع کا کہنا ہے کہ اجلاس میں عسکری حکام ملک کی سیکیورٹی کو درپیش اندرونی و بیرونی چیلنجز پر بریفنگ دیں گے۔

گزشتہ روز وزیراعظم محمد شہباز شریف نے اپنے مختصر خطاب میں اجلاس کی بابت بتایا تھا کہ ارکان اسمبلی بھی اپنے سوال کر سکتے ہیں، ایسی بات نہیں کی جائے گی کہ جس سے معاملات خراب ہوں، بلکہ معاملات صحیح کرنے کے لیے میٹنگ ہو گی، تمام ارکان کے تحفظات کو سنا جائے گا۔

مزید پڑھیے: قومی اسمبلی کا اِن کیمرہ اجلاس کیوں بلایا گیا ہے؟