فلسطین کی مزاحمتی تنظیم حماس اور اسرائیل کے درمیان جنگ بندی معاہدے کے حوالے سے اہم پیشرفت سامنے آئی ہے۔
عرب میڈیا نے دعویٰ کیا ہے کہ حماس نے غزہ پٹی سے اسرائیلی فوجیوں کے مکمل انخلا اور مکمل جنگ بندی کی شرائط سے دستبرداری اختیار کرلی ہے۔
یہ بھی پڑھیں حماس اسرائیل معاہدہ، کون سے فلسطینی قیدی رہا ہوں گے؟
عرب میڈیا کے مطابق حماس نے بیمار، عمر رسیدہ اور خواتین فوجی یرغمالیوں کی رہائی پر رضامندی کا اظہار کیا ہے، جبکہ عمر رسیدہ فلسطینی قیدیوں کی قطر اور ترکیہ منتقلی کی حامی بھی بھر لی ہے۔
عرب میڈیا کا کہنا ہے کہ حماس نے شمالی غزہ پٹی میں اسرائیلی چیک پوسٹوں کے قیام کی مخالفت کی ہے۔
دوسری جانب غیرملکی میڈیا کے مطابق حماس نے کہا ہے کہ اگر اسرائیل کی جانب سے نئی شرائط نہ عائد کی جائیں تو پھر جنگ بندی معاہدہ ممکن ہوسکتا ہے۔
غیرملکی میڈیا کا کہنا ہے کہ اسرائیل اور حماس کے درمیان جنگ بندی کے لیے قاہرہ میں مذاکرات کا سلسلہ جاری ہے، اور امکان ہے کہ چند روز میں فریقین کے درمیان جنگ بندی ہوسکتی ہے۔
واضح رہے کہ 7 اکتوبر 2023 کو فلسطین کی مزاحمتی تنظیم حماس کی جانب سے کیے گئے ایک آپریشن کے بعد اسرائیل اور حماس کے درمیان جنگ جاری ہے۔
یہ بھی پڑھیں حماس اسرائیل معاہدے کے بعد مشرق وسطیٰ کی صورت حال تبدیل ہو گی، جلیل عباس جیلانی
اسرائیلی فوج کی جانب سے کی گئی بمباری میں اب تک 44 ہزار سے زیادہ فلسطینی شہید ہوچکے ہیں، جن میں خواتین اور بچوں کی بڑی تعداد موجود ہے۔
