کراچی ایئرپورٹ پر عمرے کی آڑ میں گداگری کے لیے سعودی عرب جانے والے 4 مسافروں کو گرفتار کرلیا گیا ہے۔
وفاقی تحقیقاتی ادارے (ایف آئی اے امیگریشن) نے کراچی ایئرپورٹ پر بروقت کارروائی کرکے ملزمان کی گداگری کے لیے سعودی عرب جانے کی کوشش ناکام بنا دی۔
یہ بھی پڑھیں: عمرے کی آڑ میں گداگری کے لیے سعودی عرب جانے والی خواتین گرفتار
ترجمان ایف آئی اے کے مطابق، 4 ملزمان کو گرفتار کیا گیا ہے جن میں ثنااللہ، فیض محمد، گل حسن اور لعل محمد شامل ہیں، ملزمان فلائٹ نمبر XY-314 اور EY-297 کے ذریعے عمرہ ویزے پر سعودی عرب جارہے تھے، ملزمان کا تعلق جعفر آباد، نصیر آباد، قمبر شہدادکوٹ اور رحیم یار خان کے مختلف علاقوں سے ہے۔
ترجمان ایف آئی کا کہنا ہے کہ امیگریشن کلیئرنس کے دوران ملزمان کو مشکوک پایا گیا، ابتدائی تفتیش کے مطابق ملزمان سعودی عرب گداگری کے غرض سے جارہے تھے، گرفتار ملزمان عمرہ ادا کرنے کی بنیادی طریقہ کار سے مکمل طور پر ناواقف تھے۔
یہ بھی پڑھیں: کراچی: عمرے کی آڑ میں گداگری کے لیے سعودی عرب جانے کی کوشش ناکام، 10 گرفتار
ایف آئی اے ترجمان نے بتایا کہ ملزمان رہائش اور ہوٹل بکنگ کے حوالے سے کسی قسم کی دستاویزات دینے میں ناکام رہے، ملزمان کے پاس سفری اخراجات کے لیے کسی قسم کی رقوم نہ تھی، گرفتار ملزمان کو مزید قانونی کارروائی کے لیے انسداد انسانی اسمگلنگ سرکل کراچی منتقل کردیا گیا ہے جبکہ کیس کی مزید تفتیش جاری ہے۔
