وفاقی تحقیقاتی ایجنسی (ایف آئی اے) کمپوزٹ سرکل فیصل آباد نے یونان کشتی حادثے میں ملوث 3 انسانی اسمگلروں کے خلاف مقدمہ درج کرلیا، ڈیوٹی میں غفلت برتنے پر ایف آئی اے کے 2 افسران کو بھی گرفتار کرلیا گیا ہے۔
یہ بھی پڑھیں: یونان: کشتی حادثات میں جاں بحق پاکستانیوں کی تعداد 40 تک پہنچ گئی، ریسکیو آپریشن ختم
ترجمان ایف آئی اے کے مطابق گرفتار ملزمان میں انسپیکٹر زبیر اشرف اور سب انسپیکٹر شاہد عمران شامل ہیں، گرفتار ملزمان فیصل آباد ائرپورٹ پر بطور شفٹ انچارج تعینات تھے، گرفتار ملزمان نے دوران ڈیوٹی مسافروں کی اسکیریننگ کے عمل میں غفلت اور لاپروائی کا مظاہرہ کیا۔
یونان کشتی حادثے میں 18 متاثرین نے فیصل آباد ایئرپورٹ سے بیرون ملک سفر کیا تھا،17 متاثرین کو یونان کشتی حادثے میں ریسکیو کر لیا گیا تھا جبکہ سفیان نامی متاثرہ شہری کی کشتی حادثے میں موت واقع ہوگئی تھی۔
یہ بھی پڑھیں: یونان کشتی حادثہ کیوں پیش آیا، وجہ سامنے آگئی
ایف آئی اے کے مطابق یونان کشتی حادثے کے متاثرین سے عبدالرؤف نامی ایجنٹ نے یونان جانے کے لیے بھاری رقوم وصول کی، جن کے خلاف مقدمہ درج کرلیا گیا ہے،مقدمے میں عبدالرؤف، عباس ذوالفقار اور قمر الزمان نامی انسانی اسمگلرز نامزد کیے گئے ہیں، ملزمان کے خلاف مقدمہ درج کر کے تفتیش کا آغاز کر دیا گیا۔
ایف آئی اے کا کہنا ہے کہ انسانی سمگلروں کی گرفتاری کے لیے چھاپے مارے جارہے ہیں اور ملزمان کی گرفتاری کے لیے تمام تر وسائل کو بروئے کار لایا جارہا ہے۔
