’میرا بیٹا بکریاں چرا لیتا مگر زندہ رہتا، اب میں اس پی ایچ ڈی ڈگری کا کیا کروں؟‘  

19  دسمبر کو بلوچستان کی دوسری سب سے بڑی جامعہ بلوچستان یونیورسٹی آف انفارمیشن ٹیکنالوجی انجینئرنگ اینڈ مینجمنٹ سائنسز کے 20 ویں کانووکیشن کا انعقاد کیا گیا، جس میں مختلف شعبہ جات سے تعلق رکھنے والے 700 طلبہ و طالبات میں اسناد تقسیم کی گئیں۔ اس دوران اپنے شعبہ جات میں اعلیٰ کارکردگی دکھانے والوں کو کانسی کے تمغات سے نوازا گیا۔

اس کانووکیشن میں ایک بزرگ شخص بھی لڑکھڑاتا ہوا اسٹیج پر ڈگری وصول کرنے کے لیے پہنچا تو ہال میں موجود حاضرین میں تجسس پیدا ہوا کہ اس عمر میں ڈگری حاصل کرنے والا یہ شخص کون ہے؟ جس پر میزبان نے اس بزرگ کا تعارف سید سلطان علی کے نام سے کروایا، جو اپنے مرحوم بیٹے سید عنایت اللہ کی پی ایچ ڈی کی ڈگری حاصل کرنے آئے تھے۔

کامیابی کی آخری سیڑھی

سید سلطان علی نے بتایا کہ میرے بیٹے نے پی ایچ ڈی کی ڈگری حاصل کی جو میرے لیے کسی اعزاز سے کم نہیں، اس نے اپنی حیات کے دوران علم کے حصول کے لیے ہر ممکن کوشش کی، لیکن بد قسمتی سے کامیابی کی آخری سیڑھی پر قدم نہیں رکھ سکا، جس کی وجہ سے آج اس کے بچوں کے ہمراہ مجھے یہ ڈگری وصول کرنے آنا پڑ رہا ہے۔

جگر کا کینسر

دراصل میرا بیٹا جگر کے کینسر میں مبتلا تھا جس کی وجہ سے وہ گزشتہ برس 18 دسمبر کو خالق حقیقی سے جا ملا اور آج تقریباً ایک سال بعد میں اس کی پی ایچ ڈی ڈگری وصول کرنے آیا ہوں۔

 سید سلطان علی نے بتایا کہ میرے بیٹے کو پڑھنے لکھنے کا بہت شوق تھا بچپن ہی سے وہ ہر جماعت میں اعلیٰ نمبر حاصل کرتا تھا۔

شوگر کا عارضہ

عنایت اللہ کو علم حاصل کرنے کا اتنا شوق تھا کہ 13 سال کی عمر میں جب ہمیں پتا چلا کہ میرے بیٹے کو شوگر کا عارضہ ہے تو ہم نے اس سے کہا کہ چند دنوں کے لیے اسکول سے چھوٹی لے لو، لیکن اس بات پر وہ رونے  لگا اور کہا کہ اگر میں نے چند دن چھٹی کر لی تو میری پڑھائی کا ہرج ہوگا۔

کاش میرا بیٹا زندہ ہوتا

اپنی آنکھوں میں آنسوں لیے سید سلطان علی نے کہا کہ کاش میرا بیٹا زندہ ہوتا اور میرے سامنے پہاڑوں پر بکریاں چراتا، لیکن اب وہ زندہ نہیں اور اس کی ڈگری میرے ہاتھوں میں ہے، اب مجھے بتائیں کہ میں اس ڈگری کا کیا کروں؟