وزیراعظم پاکستان شہباز شریف کی زیرصدارت وفاقی کابینہ کے اجلاس میں رائٹ سائزنگ کے حوالے سے بنائی گئی کمیٹی نے قومی خزانے پر بوجھ بننے والے کچھ اداروں کو ضم اور کچھ کو بند کرنے کے لیے سفارشات پیش کردیں۔
وزیراعظم شہباز شریف کی زیرصدارت وفاقی کابینہ کا اجلاس اسلام آباد میں ہوا جس میں وفاقی وزرا سمیت دیگر اعلیٰ حکام نے بھی شرکت کی۔
یہ بھی پڑھیں حکومت کون سے اخراجات کم کرکے ایک سال میں 300 ارب روپے کی بچت کرے گی؟
اجلاس میں وزارت سائنس و ٹیکنالوجی، وزارت تجارت، وزارت ہاؤسنگ و ورکس، وزارت قومی غذائی تحفظ و تحقیق اور ان وزارتوں سے متعلقہ اداروں کی رائٹ سائزنگ کے حوالے سے کمیٹی کی سفارشات پیش کی گئیں۔
کمیٹی نے مذکورہ وزارتوں کے کچھ اداروں کو مکمل بند کرنے اور کچھ اداروں کو ضم کرنے کی سفارشات پیش کیں۔
کمیٹی نے ان وزارتوں کے سیکریٹریٹ میں اسٹاف کی پوسٹیں 30 فیصد تک کم کرنے کی تجویز بھی دی۔
اجلاس کو بتایا گیا کہ ان سفارشات کی منظوری کے بعد قومی خزانے کو 42.1 ارب روپے کی بچت متوقع ہے، اجلاس میں کابینہ اراکین نے ان سفارشات پر اپنی آرا دیں۔
اجلاس میں وزیراعظم نے ہدایت کی کہ کابینہ اراکین کی آرا کی روشنی میں ان وزارتوں کی رائٹ سائزنگ کے حوالے سے سفارشات اور عملدرآمد کا جائزہ لے کر وفاقی کابینہ میں دوبارہ رپورٹ پیش کی جائے۔
وفاقی کابینہ کو وفاقی وزیر داخلہ سید محسن رضا نقوی کی جانب سے پارا چنار کی صورتحال پر تفصیلی بریفنگ دی گئی۔
اجلاس کو بتایا گیا کہ پارا چنار میں امدادی سرگرمیاں جاری ہیں اور اس حوالے سے وفاقی اور خیبر پختونخوا کی حکومتیں مل کر امدادی سرگرمیوں میں حصہ لے رہی ہیں۔
یہ بھی پڑھیں وفاقی کابینہ نے 5 آئی پی پیز کے معاہدے منسوخ کرنے کی تجویز منظور کرلی
اجلاس کو مزید بتایا گیا کہ پارا چنار سے مریضوں کو دوسرے شہر منتقل کرنے کے لیے وزیراعظم کے زیر استعمال ہیلی کاپٹر مختص کیا گیا ہے۔ مزید برآں پارا چنار کےتمام اسپتالوں میں تمام ضروری ادویات دستیابی کو یقینی بنایا گیا ہے۔
