چیف آف آرمی اسٹاف جنرل سید عاصم منیر کی سینٹ جوزف کیتھولک کیتھیڈرل چرچ، راولپنڈی میں کرسمس کی تقریب میں شرکت اور ملک بھر میں مسیحی برادری کو کرسمس کی دلی مبارکباد۔
یہ بھی پڑھیں:وزیراعظم کی مسیحی برادری کو کرسمس کی مبارکباد اور خراج تحسین
چیف آف آرمی اسٹاف جنرل سید عاصم منیر نے ہم آہنگی کے جذبے کو اجاگر کرتے ہوئے سینٹ جوزف کیتھولک کیتھیڈرل چرچ، راولپنڈی میں منعقد ہونے والی کرسمس کی تقریب میں شرکت کی۔
چیف آف آرمی اسٹاف جنرل سید عاصم منیر کے چرچ پہنچنے پر پرتپاک خیرمقدم کیا گیا، اور مسیحی برادری کی جانب سے اس موقع پر ان کی موجودگی اور یکجہتی پر اظہار تشکر کیا گیا۔
جنرل سید عاصم منیر نے ملک بھر کی مسیحی برادری کو کرسمس کی دلی مبارکباد پیش کرتے ہوئے کہا کہ کرسمس ہمدردی، سخاوت اور خیر سگالی کی آفاقی قدروں کی گہری یاد دہانی کو اجاگر کرتا اور ہمارے متنوع معاشرے کو باہم جوڑے رکھنے میں معاونت کرتا ہے۔
انہوں نے پاکستان کی ثقافتی، سماجی، اقتصادی اور قومی ترقی میں اقلیتوں اور مسیحی برادری کی نمایاں شراکت کا بھی اعتراف کیا، جو قوم کے لیے فخر اور طاقت کا باعث ہے۔
قائداعظم کو زبردست خراج عقیدت
اس موقع پر جنرل عاصم منیر نے بانی قوم قائداعظم محمد علی جناح کو بھی زبردست خراج عقیدت پیش کیا۔ انہوں نے اس بات پر روشنی ڈالی کہ قائد کی دور اندیش قیادت، غیر متزلزل عزم اور ایمان، اتحاد اور نظم و ضبط کے اصولوں پر ثابت قدمی نے نہ صرف پاکستان کی تعمیر کی راہ ہموار کی، بلکہ قوم کی تعمیر کا ایک لازوال خاکہ بھی فراہم کیا۔
یہ بھی پڑھیں:کرسمس کے موقع پر دارالحکومت میں فول پروف سیکیورٹی کے انتظامات
جنرل عاصم منیر کا مزید کہنا تھا کہ آزادی، مساوات اور مذہبی رواداری کے نظریات کے لیے قائداعظم کے اصولوں سے مستقل وابستگی علاقائی سالمیت کے تحفظ سے لے کر اندرونی استحکام کو فروغ دینے تک، عصر حاضر کے چیلنجز سے نمٹنے کے لیے قوم کی حوصلہ افزائی اور رہنمائی کرتی ہے۔
انہوں نے کہا کہ آیے ہم پاکستان کو قائد کے تصور کے مطابق پُرامن اور خوشحال ملک میں تبدیل کرنے کے اپنے اجتماعی عزم کی تجدید کریں۔
جنرل عاصم منیر نے تمام شہریوں پر زور دیا کہ وہ اس مشترکہ خواہش کی تکمیل کے لیے انتھک محنت کریں۔
