جنوبی افریقہ نے 2 ٹیسٹ میچوں کی سیریز کے پہلے میچ میں پاکستان کو 2 وکٹوں سے شکست دے کر جیت اپنے نام کرلی۔
سنچورین میں کھیلے گئے ٹیسٹ میچ کے چوتھے روز جنوبی افریقہ کو جیت کے لیے 121 رنز درکار تھے، جبکہ پاکستان کو 7 وکٹیں درکار تھیں۔ جنوبی افریقہ کی ٹیم 148 رنز کے ہدف کا تعاقب کررہی تھی، تاہم تیسرے روز کھیل کے اختتام تک جنوبی افریقہ نے 3 وکٹوں کے نقصان پر 27 رنز اسکور کرلیے تھے۔
یہ بھی پڑھیں انٹرنیشنل کرکٹ کونسل کی جانب سے بابراعظم اور صائم ایوب کے لیے اعزاز
جنوبی افریقہ کی جانب سے ہدف کے تعاقب میں ٹونی ڈی زورزی اور کیلی وارین 2،2 اسکور بنا کر آؤٹ ہوگئے، جبکہ ڈیوڈ بیڈنگھم 14، ریان رکیلٹن اور کوربن بوش صفر جبکہ ٹرسٹن اسٹبس ایک رن بناکر میدان سے چلتے بنے۔
اس کے بعد ایڈن مارکرم اور کپتان ٹمبا باوما نے 43 رنز کی پارٹنرشپ قائم کی تاہم 37 رنز بناکر مارکرم بھی آؤٹ ہوگئے، اس کے بعد ٹمبا باوما نے 4 چوکوں اور ایک چھکے کی مدد سے 40 رنز کی جارحانہ اننگز کھیلی اور ٹیم کی جیت میں اہم کردار ادا کیا۔
پاکستان کی جانب سے محمد عباس نے 6 کھلاڑیوں کو پویلین کی راہ دکھائی، جبکہ نسیم شاہ اور خرم شہزاد ایک ایک کھلاڑی کو آؤٹ کرنے میں کامیاب رہے۔
اس سے قبل گزشتہ روز پاکستانی ٹیم اپنی دوسری اننگز میں 237 رنز بنا کر آؤٹ ہوگئی تھی۔
تیسرے دن کا کھیل
سینچورین ٹیسٹ کے تیسرے روز کے کھیل کے اختتام پر 148 رنز کے ہدف کے تعاقب میں جنوبی افریقا نے پاکستان کے خلاف 3 وکٹ کے نقصان پر 27 رنز بنائے تھے۔
اس سے قبل پہلے ٹیسٹ میچ کے تیسرے روز کا کھیل بارش کے باعث تاخیر سے شروع ہوا۔ سینچورین میں بارش کے باعث پچ اور اسکور بورڈ کو کوورز سے ڈھانپ دیا گیا تھا۔ سینچورین میں پرسوں رات تیز بارش ہوئی تھی جبکہ کل بھی ہلکی بارش ہوتی رہی۔
بارش رکنے پر پاکستان نے اپنی دوسری اننگز 3 وکٹ 88 رنز سے دوبارہ شروع کی، اس روز آؤٹ ہونے والے پہلے کھلاڑی بابر اعظم تھے جو 50 رنز بنا کر 153 کے مجموعی اسکور پر آؤٹ ہوئے۔ دوسری اننگز میں سعود شکیل نے سب سے زیادہ 84 رنز اسکور کیے، کپتان شان مسعود نے 28 رنز بنائے۔ عامر جمال 18 رنز بنا کر آؤٹ ہوئے، سلمان آغا ایک رن بناسکے۔
جنوبی افریقا کی جانب سے مارکو ینسین نے 6 کھلاڑیوں کو آؤٹ کیا۔ ربادانے 2، بوش اور پیٹرسن نے ایک، ایک وکٹ حاصل کی۔ پاکستان کی ٹیم دوسری اننگز میں بھی فیل ہوگئی اور پوری ٹیم 237 رنز بنا کر آؤٹ ہوگئی، جنوبی افریقا کو جیت کے لیے 148 رنز کا ہدف ملا۔
دوسرے دن کا کھیل
پاکستان اور جنوبی افریقہ کے درمیان 2 ٹیسٹ میچز کی سیریز کے پہلے میچ کے دوسرے دن جنوبی افریقہ اپنی پہلی اننگز میں 301 رنز بنا کر آؤٹ ہوگئی تھی۔ اس سے قبل میچ کے پہلے روز پاکستان کی ٹیم اپنی اننگر میں 211 رنز پر آل آؤٹ ہوگئی تھی۔
دوسرے جنوبی افریقہ نے 3 وکٹوں کے نقصان پر 82 رنز سے اننگز کا دوبارہ آغاز کیا۔ چوتھا کھلاڑی 136 کے مجموعی اسکور پر آؤٹ ہوگیا۔ دوسرے روز پاکستانی بولرز کی محنت 37ویں اوور میں رنگ لائی جب فاسٹ بولر عامر جمال جنوبی افریقہ کی جانب سے چوتھی وکٹ کی شراکت میں جاری مزاحمت کو توڑتے ہوئےکپتان ٹیمبا باووما کی وکٹ حاصل کرنے میں کامیاب ہوئے۔
وکٹ کیپر محمد رضوان کے ہاتھوں کیچ آؤٹ ہونے تک جنوبی افریقہ کے کپتان نے 31 رنز اسکور کیے تھے، ایڈن مرکرم 89 رنز بنا کر آؤٹ ہوئے۔ چھٹے نمبر پر بیٹنگ کے لیے آئے ڈیوڈ بیڈنگہیم 30 رنز بناکر نسیم شاہ کی گیند پر عامر جمال کے ہاتھوں سلپ میں آؤٹ ہوئے۔
ان کی جگہ کھیلنے آئے کائل ورائن بھی 2 رنز بنا کر نسیم شاہ کی گیند پر آغا سلمان کے ہاتھوں آؤٹ ہوئے۔ 191 کے مجموعی اسکور پر جنوبی افریقہ کی 7ویں وکٹ بھی نسیم شاہ نے اپنے نام کی جب مارکو جینسن 2 رنز بناکر وکٹ کیپر محمد رضوان کو کیچ دے بیٹھے۔
جنوبی افریقہ کے ابتدائی 3 بلے باز ٹیسٹ میچ کے پہلے روز ہی آؤٹ ہوگئے تھے، جنوبی افریقہ کی ٹیم کو پہلا جھٹکا اس وقت لگا جب تیسرے ہی اوور میں اوپنر ٹونی زورزی محض 2 رنز بنا کر خرم شہزاد کی گیند پر بولڈ ہوگئے۔ جنوبی افریقہ نے 73.4 اوورز میں 301 رنز بنائے۔
پہلے دن کا کھیل
سینچورین ٹیسٹ کے پہلے روز جنوبی افریقہ نے ٹاس جیت کر پاکستان کو پہلے بیٹنگ کی دعوت دی، تاہم پاکستان کی پوری ٹیم 211 رنز بنا کر آؤٹ ہوگئی تھی
جس کے بعد بعد جنوبی افریقہ نے پہلے دن کا کھیل ختم ہونے تک 3 وکٹوں کے نقصان پر 82 رنز بنائے تھے۔
