وفاقی وزرا نے ’اڑان پاکستان‘ منصوبے کو ملکی ترقی کے لیے ناگزیر قرار دیتے ہوئے کہا کہ ملک میں میکرو اکنامک اسٹیبلیٹی آچکی ہے، جسے پائیدار ترقی کی جانب لے کر جانا ہوگا۔ پاکستان کو سیاسی انتشار لانگ مارچ نہیں اقتصادی لانگ مارچ کی ضرورت ہے۔
وفاقی وزیر برائے منصوبہ بندی وترقی احسن اقبال نے اپنے ویڈیو پیغام میں کہا ہے کہ ’اڑان پاکستان‘ ہوم گرون نیشنل اکنامک پلان 29-2024 سے ملک میں معاشی ترقی کے حصول میں مدد ملے گی۔
مزید پڑھیں: اڑان پاکستان پروگرام نے پاکستان اسٹاک مارکیٹ پر کیسے مثبت اثرات ڈالے؟
انہوں نے پائیدار ترقی کے اہداف کے حصول کے لیے برآمدات کے فروغ ’ای کامرس‘ انسانی وسائل کی ترقی، زرعی شعبے میں جدت اور توانائی کے نظام کو مؤثر بنانے پر زور دیا۔ ان کا کہنا تھا کہ پائیدار ترقی کے لیے امن، سیاسی استحکام اور پالیسیوں کے تسلسل کی ضرورت ہے۔ پاکستان کو مستقل بنیادوں پر ترقی دینے کے لیے دن رات کوشاں ہیں، پاکستان کو سیاسی انتشار لانگ مارچ نہیں اقتصادی لانگ مارچ کی ضرورت ہے۔
وفاقی وزیر خزانہ محمد اورنگزیب نے اپنے ویڈیو پیغام میں کہا ہے کہ پاکستان کی معیشت مستحکم ہوچکی ہے اور ملک ترقی کی جانب بڑھ رہا ہے۔ ’اڑان پاکستان‘ پروگرام کے تحت ہماری گروتھ ریٹ برآمدات پر مبنی ہوگی۔ نجی شعبے کو بھی فرنٹ سے لیڈ کرنا ہوگا۔ ترقی کے لیے اڑان پاکستان ہوم گرون نیشنل اکنامک پلان ناگزیر ہے۔
وفاقی وزیر خزانہ محمد اورنگزیب نے مزید کہا کہ ملک میں میکرو اکنامک اسٹیبلیٹی آچکی ہے، جسے پائیدار ترقی کی جانب لے کر جانا ہوگا۔ انہوں نے کہا کہ مضبوط معیشت عوام کے گھروں کی خوشحالی سے جڑی ہے، جب ہر ایک کا چولہا جلےگا اور ہر گھر میں خوشحالی ہو گی تو معیشت مضبوط ہوگی۔
مزید پڑھیں: وزیر اعظم آج ہوم گرون اکنامک ایجنڈے ’میڈ ان پاکستان‘ کا اعلان کریں گے
وفاقی وزیر اطلاعات عطا اللہ تارڑ نے کہا کہ ’اڑان پاکستان‘ میڈ ان پاکستان معاشی اصلاحات کا ایجنڈا ہے، ملک ڈیفالٹ سے استحکام کی طرف آیا ہے اور اب استحکام سے ترقی کی جانب بڑھ رہا ہے۔ وزیراعظم شہباز شریف آج ہوم گرون اکنامک ایجنڈے کا اعلان کرنے جارہے ہیں، معاشی اصلاحات کے ایجنڈے میں پاکستان کے عوام کے لیے خوشخبریاں ہوں گی۔
عطا اللہ تارڑ کا کہنا تھا کہ الحمدللہ پاکستان کے تمام معاشی اشاریے بہتر ہوئے ہیں، ہوم گرون معاشی اصلاحات کا ایجنڈا اہم اقدام ہے جو پاکستان اور پاکستان کے عوام کی ترقی کے لیے ہے۔ پائیدار ترقی کے لیے سیاسی استحکام ناگزیر ہے، مضبوط معیشت ہی مضبوط پاکستان بنا سکتی ہے جس کے لیے ہم سب کو مل کر کام کرنا ہوگا۔
