وزیر اطلاعات و ثقافت پنجاب عظمیٰ بخاری نے کہا ہے کہ معافی اس کو ملتی ہے جس نے معافی مانگی ہو۔ پی ٹی آئی والے دوبارہ 9 مئی دہرانے کے لیے تیار ہیں انہیں معافی نہیں ملنی چاہیے۔ یہ اڈیالہ جیل میں بانی پی ٹی آئی کے سیل میں گھسنا چاہتے ہیں۔ ایسے بلوائیوں کو رعایت ملے گی تو بار بار 9 مئی ہوگا۔
لاہور میں پریس کانفرنس کرتے ہوئے عظمیٰ بخاری کا کہنا تھا کہ معافی کے بعد رہا ہونے والے دوبارہ 9 مئی کا جذبہ رکھتے ہیں۔ بانی پی ٹی آئی اپنے کیے پر کبھی شرمندہ نہیں ہوئے۔ پی ٹی آئی نے معصوم بچوں کو انتشاری سیاست کا ایندھن بنایا۔ یہ ایک طرف معافی نامہ لکھتے ہیں دوسری طرف دھمکیاں بھی دیتے ہیں۔
عظمیٰ بخاری کا کہنا تھا کہ انتشار و فساد کا ایندھن بننے والے بچوں سے ہمدردی ہے، ایک طرف والدین ترلے منتے کرتے ہیں پھر باہر نکل کر زبان استعمال کر رہے ہیں کہ وہ تو 9 مئی دہرانے کے لیے تیار ہیں، یہ کیا رعایت کے مستحق ہیں؟ اگر اب بھی 9 مئی کرنا چاہتے ہیں تو پھر معافی نہیں ملنی چاہیے۔ کے پی وزیر اعلیٰ ہاؤس میں بلوائیوں کے اعزاز تقریب ہوتی ہے کیا اچھا کام ہے یہ تو راستے بند کررہے ہیں۔ بلوائی پھر دھمکیاں دیتے اچھے لگیں گے کہ لیڈر کے لیے رعایت ہونی چاہیے۔
مزید پڑھیں: غیرسیاسی خاتون جلسے جلوسوں کی منصوبہ بندی کرتی ہے، عظمیٰ بخاری کی بشریٰ بی بی پر تنقید
ان کا کہنا تھا کہ مریم نواز انتقامی کارروائیوں پر یقین نہیں رکھتیں۔ مریم نواز پنجاب کے عوام کی فلاح کے لیے بھرپور انداز میں کام کر رہی ہیں۔ پنجاب میں ترقیاتی منصوبوں پر کام جاری ہے۔ ہم نے مہنگائی میں کمی کے لیے سرتوڑ کوشش کی۔ ہم نے مہنگائی کا رونا نہیں رویا، مہنگائی میں واضح طور پر کمی آئی ہے۔
عظمیٰ بخاری نے کہا کہ مہنگائی میں کمی پر وزیراعظم اور مریم نواز مبارکباد کے مستحق ہیں۔ 2025 کی پہلی پریس کانفرنس پر خوشی ہورہی ہے سال کے شروع میں بھی مریم نواز کی جانب سے خوشخبریاں سنا رہی ہوں۔ مریم نواز ہر ہفتہ پنجاب کے عوام کی بہتری کا پروگرام بناتی ہیں، ہر اجلاس صوبہ کے عوام کی ترقی فلاح و بہبود کے لیے ہوتا ہے۔
انہوں نے مزید کہا کہ اجلاس میں یہ نہیں ہوتا کسی کو پکڑلو، گرفتار کرلو۔ پہلے مہنگائی میں عالمی اعداد شمار بتائے جاتے رہے ہیں اب تو مہنگائی کم ہوگئی ہے۔ مہنگائی کا رونا نہیں رویا بلکہ عمل کرکے دکھایا، بڑے بڑے عالمی جریدے کہہ رہے پاکستان میں سٹاک ایکسچینج ہو یا ڈیفسڈ ہو سب بہتر ہو رہا ہے۔
مزید پڑھیں: جلاؤ گھیراؤ اور مار دو مقدر نہیں، ہم مل کر ہی ملک کو آگے لے جاسکتے ہیں، عظمیٰ بخاری
عظمیٰ بخاری نے کہا کہ شہباز شریف اور مریم نواز کو خراج تحسین پیش کرتی ہوں مہنگائی کے لیے دونوں نے کردار ادا کیا۔ بجلی کی قیمتوں نے معیشت اور بجٹ کو بھی متاثر کیا۔ 14 روپے فی یونٹ پر 54 ارب روپے کی سبسڈی دی، اب مفت سولر پروگرام دیا جارہا ہے۔ بجٹ سے 10 ارب روپے کے ایک لاکھ فری پینل 200 یونٹ والوں کو دیں گے۔
ان کا کہنا تھا کہ 100 یونٹ والوں کی ضرورت کے مطابق سولر دیا جائے گا۔ مفت سولر کے لیے صارفین اپنے شناختی کارڈ 8800 پر رجسٹرڈ کروا سکتے ہیں۔ ملک میں مہنگائی کی شرح کم ہو کر 4.1 فیصد پر آگئی ہے۔ پنجاب کے عوام کی فلاح وبہبود کے لیے متعدد منصوبے شروع کر رکھے ہیں۔ وزیراعلیٰ پنجاب تمام اسکیمز میں میرٹ کو ترجیح دے رہی ہیں۔
عظمیٰ بخاری نے کہا کہ سولر پروگرام عوام کو ریلیف دینے کے لیے شروع کیا گیا۔ کسی بھی پروگرام میں کوئی پارٹی بازی نہیں ہورہی، یہ نہیں ہو رہا کہ پی ٹی آئی کا بندہ ہے تو اسے ٹریکٹر نہیں دینا۔
