جیل انسانوں کو قید کرسکتی ہے لیکن ان کی تخلیقی صلاحیتوں کو نہیں۔ ایسا ہی کچھ مشاہدہ کیا جاسکتا ہے ہری پور کی ایک جیل میں جہاں قیدیوں کی دستکاری نے دھوم مچائی ہوئی ہے۔
محکمہ جیل خانہ جات خیبر پختونخوا نے قیدیوں کی تخلیقی صلاحیتوں کو نکھارنے کا بندوبست کیا تو صرف 6 ماہ کی مختصر تربیت رنگ لے آئی۔
یہ بھی پڑھیں: سینٹرل جیل کراچی کے قیدی عربی اور چینی زبان کیوں سیکھ رہے ہیں؟
جرم کی بھیانک دنیا کے باسیوں کے دل کا حسن، تخلیقی صلاحیت اور ہاتھ کی صفائی دلکش فن پاروں کی صورت میں سامنے آئی۔ قیدی برسرروزگار ہوگئے اور جیل میں رہ کر ہی اپنے گھر والوں کی بڑی حد تک کفالت بھی کرنے لگ گئے۔
محکمہ جیل کے اس احسن اقدام نے مجرموں کو خود داری اور محنت کشی کا راستہ دکھا دیا۔
اسی حوالے سے جیل کے باہر ایک ڈسپلے ایک طرف تو پابند سلاسل قیدیوں کی مثبت سوچ کا عکاس ہے تو دوسری طرف دستکاری کے قدردانوں کی نگاہوں کا مرکز بھی ہے۔
