پی ٹی آئی رہنما اور سابق اسپیکر قومی اسمبلی اسد قیصر نےکہا ہے کہ خواجہ آصف اور مریم نواز کی کوشش ہےکہ ہر ممکن طریقے سے مذاکرات ناکام بنا دیے جائیں۔ مذاکرات سے متعلق ہماری کمٹمنٹ ہے اس لیے اعتماد سے بات کر رہے ہیں۔
میڈیا رپورٹس کے مطابق انہوں نے کہا کہ عمران خان سے ملاقات کرانے کے وعدے کے بعد حکومت کی جانب سے اب بہانے کیے جارہے ہیں، نہ کسی خوف میں مبتلا ہیں نہ کسی سے ڈر رہے ہیں، صرف پاکستان کی خاطر اپنے تحفظات کو پیچھے کیا ہے۔
مزید پڑھیں: مسلم لیگ ن کی جانب سے مذاکراتی کمیٹی نواز شریف کی مرضی سے بنی، سینیٹر عرفان صدیقی
انہوں نے کہا کہ مریم نواز اور خواجہ آصف کی باتوں پر افسوس ہے، ان کی کوشش ہےکہ ہر ممکن طریقے سے مذاکرات ناکام بنا دیے جائیں۔
واضح رہے کہ وزیر دفاع خواجہ آصف نے کہا تھا کہ بانی پی ٹی آئی کے ٹوئیٹ کے بعد مذاکرات نہیں بنتے لیکن اتمامِ حجت کے لیے مذاکرات ہونے چاہئیں۔ پی ٹی آئی کا ان کے بانی سے ملاقات کا مطالبہ پورا کرنے میں حرج نہیں، بانی پی ٹی آئی کی بنی گالہ منتقلی سے متعلق دعوے صرف خواہشات ہیں اور اس میں کوئی صداقت نہیں، رہائی کا فیصلہ عدالت نےکرنا ہے۔
