قومی کرکٹ ٹیم کے سابق اسپن بولر عبدالرحمان کو پاکستانی ٹیم کا اسپن بولنگ کوچ مقرر کردیا گیا۔
میڈیا رپورٹس کے مطابق نوتعینات اسپن بولنگ کوچ عبدالرحمان نے ملتان میں قومی کرکٹ ٹیم کو جوائن کرلیا ہے۔
یہ بھی پڑھیں قومی کرکٹر صائم ایوب کا لندن میں پہلا چیک اپ مکمل
بائیں ہاتھ کے اسپنر عبدالرحمان کا قومی کرکٹ ٹیم کے ساتھ سفر 2006 سے 2014 تک رہا۔ اس دوران انہوں نے ٹیسٹ، ون ڈے اور ٹی20 انٹرنیشنلز میں مجموعی طور پر 140 وکٹیں حاصل کیں۔
عبدالرحمان کا تعلق پنجاب کے شہر سیالکوٹ سے ہے، وہ اس سے قبل پاکستان خواتین ٹیم کے کوچنگ اسٹاف میں شامل تھے، قومی ٹیم کے ساتھ بحیثیت اسپن بولنگ کوچ عبدالرحمان کا یہ پہلا تجربہ ہوگا۔
واضح رہے کہ پاکستان کرکٹ ٹیم ان دنوں ٹیسٹ کپتان شان مسعود کی قیادت میں ملتان میں موجود ہے جہاں ویسٹ انڈیز کے ساتھ دو ٹیسٹ میچوں کی سیریز کا پہلا میچ 17 جنوری کو شروع ہوگا۔
پاکستان کرکٹ بورڈ کی سلیکشن کمیٹی نے ویسٹ انڈیز کے خلاف 15 رکنی اسکواڈ کا اعلان کیا ہے۔
یہ بھی پڑھیں عاقب جاوید کو قومی کرکٹ ٹیم کا ہیڈ کوچ مقرر کیا جائے گا، چیئرمین پی سی بی کی تصدیق
سلیکشن کمیٹی کی جانب سے کیے گئے اعلان کے مطابق قومی ٹیسٹ ٹیم کی قیادت شان مسعود کریں گے۔ جبکہ اس کے علاوہ 3 اسپنرز نعمان علی، ابرار احمد اور ساجد خان کو ٹیم میں شامل کیا گیا ہے۔
