کراچی میں پھیلنے والی وبا کورونا یا کچھ اور؟

کراچی شہرمیں بڑی تعداد میں لوگ نزلہ، کھانسی اور بخار میں مبتلا ہورہے ہیں، طبی ماہرین نے نہ صرف احتیاطی تدابیر اپنانے پرزوردیا ہے بلکہ سال میں ایک بار انفلوئنزا کی ویکسین لازمی لگوانے کی بھی ہدایت کی ہے۔

ڈاؤ اسپتال متعدی امراض کے ماہر پروفیسر سعید خان کے مطابق ٹیسٹ کروانے پر 25 سے 30 فیصد مریضوں میں کورونا مثبت آرہا ہے، 10 سے 12 فیصد مریضوں میں انفلوئنزا ایچ 1 این 1 وائرس کی جبکہ 10 فیصد بچوں میں سانس کی نالی کے انفیکشن کی تصدیق ہورہی ہے۔

یہ بھی پڑھیں:چین میں پھیلنے والا وائرس 2 دہائیوں سے پاکستان میں موجود ہے، این آئی ایچ کا انکشاف

’کورونا، انفلوئنزا ایچ 1 این 1 اور سردیوں کے دیگروائرل انفیکشن کی علامات ملتی جلتی ہیں، اکثرمریض ٹیسٹ نہیں کرواتے جس کے باعث بیماریوں کی تصدیق نہیں ہوپاتی۔‘

سول اسپتال کراچی کے ایڈیشنل میڈیکل سپرنٹنڈنٹ ڈاکٹرنظام شیخ کے مطابق سول اسپتال میں وائرل انفیکشن کے یومیہ 200 مریض رپورٹ ہورہے ہیں۔ ’شہری ماسک لازمی پہنیں اور خود کو ڈھانپ کر رکھیں، ہرسال انفلوئنزا کی ویکسین لازمی لگوانے سے اس وبا کو کم کیا جا سکتا ہے۔‘

جنال اسپتال کے ایمرجنسی اورحادثات کے شعبہ کے انچارج ڈاکٹرعرفان کے مطابق ان کے اسپتال میں وائرل انفیکشن کے یومیہ 150 سے 200 مریض آرہے ہیں، وائرل انفیکشن اوردیگربیماریوں سے بچنے کے لیے شہری احتیاطی تدابیرلازمی اپنائیں۔

ترجمان محکمہ صحت سندھ کے مطابق سرکاری اسپتالوں میں فی الوقت کورونا کے ٹیسٹ کی سہولیات میسر نہیں ہے، کورونا وبا کے بعد لوگوں نے ٹیسٹ کروانا چھوڑ دیے تھے۔

وزیر صحت سندھ ڈاکٹرعذرا پیچوہوکے مطابق کراچی میں کووڈ پھیلنے کی خبرغلط ہے، 100 سے زائد ٹیسٹ کرنے کے بعد 7 شہریوں کا کووڈ ٹیسٹ پازیٹوآیا ہے۔

’موسمی فلواورانفلوئنزا میں مبتلا لوگوں کا احتیاطاً کووڈ ٹیسٹ کروایا گیا تھا، کووڈ پوزیٹیو لوگوں میں فلو کی بہت ہلکی علامات تھیں، کووڈ میں مبتلا افراد کو ہلکی علامات کے سبب گھر بھیج دیا گیا تھا۔‘

صوبائی وزیرصحت کا مزید کہنا تھا کہ دنیا بھر میں اب کووڈ کو فلو کی طرح ہی ٹریٹ کیا جاتا ہے، کووڈ اب موسمی فلو کی طرح ہے اس سے گھبرانے کی قطعاً ضرورت نہیں۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں