مجھے بھائی کیوں کہا؟ فہیم اشرف کا افتخار احمد سے مُسکراتا شکوہ

پاکستان کرکٹ ٹیم میں ’چاچا‘ کے نام سے مشہور 32 سالہ افتخار احمد نے 29 سالہ فہیم اشرف کو گفتگو کے دوران ’بھائی‘ کہا تو اس پر فہیم اشرف نے کیا ری ایکشن دیا؟ یہ ایک دلچسپ قصہ ہے، بعد ازاں افتخار احمد نے فہیم اشرف سے معذرت کی۔

لاہور قذافی اسٹیڈیم میں نیوزی لینڈ کے خلاف تیسرے ٹی 20 میچ میں افتخار احمد نے 24 بالوں پر 60 اور فہیم اشرف نے 14 بالوں پر 27 رنز بنائے۔ افتخار احمد نے جارحانہ بلے بازی کی لیکن ٹیم کے کام نہ آسکی اور آخری مراحل میں آکر میچ ہار گئے۔

میچ کے بعد پی سی بی نے افتخار احمد اور فہیم اشرف کا ایک ویڈیو پیغام جاری کیا جس میں افتخار احمد نے قوم سے معافی مانگتے ہوئے کہا کہ ہم میچ جیت سکتے تھے لیکن ہار گئے جس پر شرمندہ ہیں لیکن پوری کوشش ہوگی باقی میچز جیت کر سیریز جیت جائیں۔

افتخار احمد کی گفتگو کے دوران اس وقت دلچسپ صورت حال پیدا ہوگئی جب انہوں نے اچانک فہیم اشرف کو ’فہیم بھائی‘ کہہ دیا۔ عین اسی وقت فہیم اشرف نے ہنستے ہوئے افتخار کی طرف دیکھا۔ جس پر افتخار نے ہنستے ہوئے کہا کہ معذرت میں نے پھر بھائی کہہ دیا ہے۔ جس پر دونوں نے قہقہے لگائے اور بات جاری رکھی۔

اس سارے معاملے کے بعد فہیم اشرف نے کہا کہ میری خوش قسمتی ہے کہ مجھے کریز پر ہمیشہ بہترین ساتھی ملتے ہیں۔ پی ایس ایل میں اعظم خان تھے اور یہاں افتخار احمد۔ ایسے کھلاڑیوں کے ساتھ کھیل کر بالکل دباؤ محسوس نہیں ہوتا۔