سابقہ بھارتی اداکارہ ثنا خان نے افطار پارٹی کے موقع اپنی شیئر کی جانے والی ویڈیو پر خاموشی توڑ دی ہے۔ اس ویڈیو میں ان کےشوہر ان کا ہاتھ پکڑے تیز رفتاری سے چلتے ہوئے دیکھے جاسکتے ہیں۔
بھارت کے سیاست دان بابا صدیق کی دعوت پر ممبئی میں منعقدہ ایک افطارپارٹی میں بالی ووڈ کی سابقہ اداکارہ ثنا خان اور ان کے شوہرحافظ انس صیاد بھی شریک ہوئے۔ جہاں بالی ووڈ کے دیگر اداکاروں نے بھی شرکت کی۔
اس افطار پارٹی کی ایک ویڈیو ڈیجیٹل کری ایٹر ’وائرل بھایانی‘ کے انسٹا گرام اکاؤنٹ سے شیئر کی گئی ہے جس کے کیپشن میں لکھا تھا: ثنا خان تھک گئی۔
کیپشن میں اداس چہرے والے ایموٹیکون لگاتے ہوئے مزید لکھا تھا: ثنا خان نے اپنے شوہر کے ساتھ آج رات بابا صدیق کی افطار پارٹی میں شرکت کی وہ بہت جلدی میں دکھائی دے رہے تھے۔
مذکورہ ویڈیو میں ثنا خان کو ان کے شوہرحافظ انس صیاد کا ہاتھ پکڑے تیزی سے جاتے ہوئے دیکھا جا سکتا ہے۔ واضح رہے کہ رواں سال اداکارہ ثنا خان نے ایک انٹر ویو میں اپنے حاملہ ہونے کی تصدیق بھی کی تھی۔
View this post on Instagram
سابقہ اداکارہ کی انسٹا گرام پر شئیر کی جانے والی ویڈیو پر صارفین نے مختلف تبصروں کے انبار لگادیے۔ ایک صارف نے ان کے شوہر کو مخاطب کرتے ہوئے لکھا کہ ’اسے سانس لینے دو۔‘
ایک اور صارف نے لکھا: وہ اس کو اس حالت میں تیزی سے کھینچ کر کیوں لے کر جا رہا ہے؟
اپنی ویڈیو پرمختلف تبصروں کے درمیان شاید کسی ذومعنی تبصرے کے بعد ہی اداکاری ترک کرنے کے باوجود خبروں کی زینت بننے والی شخصیت ثنا خان نے کمنٹس سیکشن میں اپنی اس ویڈیو کے حوالے سے اپنا ردعمل ریکارڈ کیا ہے۔
ثنا خان نے لکھا کہ یہ ویڈیو ابھی میرے نوٹس میں آئی ہے اور میں جانتی ہوں کہ یہ میرے تمام پیارے بہن اور بھائیوں سمیت خود مجھے بھی عجیب لگ رہی ہے۔
سابقہ اداکارہ کا کہنا تھا کہ جب ہم باہر نکلے تو ڈرائیور سے ہمارا رابطہ منقطع ہو گیا تھا اور زیادہ دیر تک کھڑا رہنے کی وجہ سے مجھے پسینہ آنے لگا۔ اسی لیے میرے شوہر مجھے جلدی سے اندر لے جانا چاہتے تھے تاکہ میں بیٹھ کر پانی پی سکوں۔
انہوں نے مزید لکھا کہ میں نے ہی ان سے کہا تھا کہ جلدی سے اندر جاتے ہیں کیونکہ میڈیا والے وہاں موجود تمام مہمانوں کی تصاویر کھینچ رہے تھے اور ہم ان کو پریشان نہیں کرنا چاہتے تھے۔
اداکارہ نے لکھا کہ گزارش ہے کہ دوسری طرح مت سوچیں۔
واضح رہے کہ اداکارہ ثنا خان نے چند سال پہلے بالی ووڈ انڈسٹری کو خیرباد کہہ دیا تھا اور نومبر2020 میں سورت سے تعلق رکھنے والے کاروباری شخصیت حافظ انس صیاد سے شادی کی تھی۔
