اسپیکر صوبائی اسمبلی مشتاق غنی کی جانب سے خیبر پختونخوا میں انتخابات میں تاخیر کے خلاف درخواست پرالیکشن کمیشن کو جواب جمع کرانے کے لیے مہلت دیتے ہوئے پشاور ہائیکورٹ نے سماعت 4 مئی تک ملتوی کردی۔
اسپیکرمشتاق غنی کے وکیل بیرسٹر گوہر خان نے موقف اپنایا کہ 17 اپریل کو صوبائی نگران حکومت کی مدت ختم ہوچکی ہے۔ آئین کے مطابق نگران کی مدت ختم ہوگئی ہے ابھی تک الیکشن تاریخ بھی نہیں دی گئی۔
الیکشن کمیشن کے وکیل کی جانب سے جواب جمع کرنے کے لیے مزید مہلت طلب کرنے پربیرسٹر گوہر خان بولے کہ الیکشن کا معاملہ ہے لہٰذا جلد تاریخ دی جائے۔
ایڈووکیٹ جنرل عامرجاوید کا کہنا تھا کہ صوبائی حکومت کی طرف سے جواب تیار ہے۔ تاریخ گورنر اور الیکشن کمیشن نے دینی ہے۔ گورنر کو بھی نوٹس جاری کیا جائے۔
جسٹس محمد ابراہیم خان نے ریمارکس دیے کہ آئندہ سماعت پرالیکشن کمیشن اپنا جواب جمع کرائے۔ کسی قسم کا مزید التوا دیے بغیراس کیس کو سنیں گے۔ چار مئی کو اس کیس کو سن کر فیصلہ کریں گے۔
ان ریمارکس کے ساتھ پشاور ہائیکورٹ کے دو رکنی بینچ نے سماعت 4 مئی تک ملتوی کردی ہے۔