گلاب کو ہمیشہ محبت، خوبصورتی اور خوشبو کی علامت سمجھا جاتا ہے، اور دنیا بھر میں لوگ روز ڈے پر خاص طور پر اس کا تبادلہ کرتے ہیں۔ اسی موقع پر، ہم نے اسلام آباد کے مختلف دکانداروں اور نرسری مالکان سے گلاب کی اقسام، اس کی فروخت اور اہمیت کے بارے میں جاننے کی کوشش کی۔
اسلام آباد کے سیکٹر F-7 میں واقع ایک معروف پھولوں کی دکان کے مالک نے ہمیں بتایا کہ گلاب کی کئی اقسام دستیاب ہیں، جن میں پیلا، گلابی، اور سب سے زیادہ مقبول سرخ گلاب شامل ہیں۔ ان کے مطابق، سرخ گلاب کو ہمیشہ محبت کی علامت سمجھا گیا ہے، اور یہی وجہ ہے کہ لوگ خاص طور پر اس کی خریداری کرتے ہیں۔
انہوں نے مزید بتایا کہ کچھ نایاب اقسام ہالینڈ، ملائیشیا اور دبئی سے بھی درآمد کی جاتی ہیں، جو ان کے گاہکوں کو منفرد اور خوبصورت لگتی ہیں۔ تاہم پاکستان میں سب سے زیادہ پھولوں کی کاشت لاہور میں ہوتی ہے، اور یہ اپنی دکان کے لیے پھول لاہور سے ہی لاتے ہیں۔
بعد ازاں، ہم نے اسلام آباد کی ایک نرسری کا دورہ کیا، جہاں ایک مالی نے ہمیں گلاب کے ایک منفرد پھول ’ٹائیگر گلاب‘ کے بارے میں بتایا۔ یہ ایک خاص قسم کا گلاب ہوتا ہے جس پر زرد رنگ کی دھاریاں ہوتی ہیں، جو اسے عام گلاب سے منفرد بناتی ہیں۔
انہوں نے مزید کہا کہ گلاب کا سیزن فروری سے شروع ہوتا ہے اور گرمیوں کے اختتام تک جاری رہتا ہے۔ موسم کے مطابق لوگ مختلف اقسام کے گلاب خریدتے ہیں، لیکن سرخ گلاب ہمیشہ سب سے زیادہ مقبول رہتا ہے۔
’جب بھی ہم گلاب کا تصور کرتے ہیں، سب سے پہلے ہمارے ذہن میں سرخ رنگ آتا ہے، اسی لیے لوگ زیادہ تر سرخ گلاب کو ہی ترجیح دیتے ہیں۔‘
