پاکستان تحریک انصاف نے پنجاب اور خیبر پختونخوا کی نگران حکومتوں کی فراغت کے لیے سپریم کورٹ میں درخواست دائر کر دی ہے۔
تحریک انصاف کی جانب سے دائر درخواست میں موقف اختیار کیا گیا ہے کہ آئینی مدت کی تکمیل کے بعد پنجاب اور پختونخوا کے نگران وزرائے اعلیٰ کو فوری طور پر عہدوں سے ہٹایا جائے۔
پی ٹی آئی نے درخواست میں دونوں نگران وزرائے اعلیٰ کو اختیارات کے استعمال سے فوری طور پر روکنے کی بھی استدعا کی ہے۔
*پنجاب و پختونخوا میں نگران حکومتوں کی مدتِ کار کی تکمیل کے بعد دونوں حکومتوں کی فراغت کا معاملہ
پاکستان تحریک انصاف نے آئینی مدت کی تکمیل کے بعد پنجاب و پختونخوا کی نگران حکومتوں کو ہٹانے کیلئے قانونی کارروائی کا آغاز کردیا
پاکستان تحریک انصاف کی جانب سے سپریم کورٹ آف… pic.twitter.com/3vZrQ0Vh63
— PTI (@PTIofficial) April 19, 2023
اس کے علاوہ عدالت عظمیٰ سے اپنی نگرانی میں پنجاب اور خیبر پختونخوا میں روزمرہ کے امور چلانے کا طریقہ کار وضع کرنے کی بھی استدعا کی گئی ہے۔
درخواست میں کہا گیا ہے کہ عام انتخابات کے انعقاد کے نتیجے میں منتخب حکومتوں کے قیام تک روزمرہ کے امور کی دیکھ بھال کے لیے عدالت اپنی نگرانی میں طریقہ کار وضع کرے۔
درخواست صدر پاکستان تحریک انصاف چوہدری پرویز الٰہی اور سابق وزیراعلیٰ خیبر پختونخوا محمود خان کی جانب سے دائر کی گئی ہے۔
درخواست میں وفاق کو داخلہ، خزانہ اور قانون و انصاف کے سیکرٹریز کے ذریعے فریق بنایا گیا ہے۔ اس کے علاوہ صدر اور وزیراعظم کے پرنسپل سیکرٹریز کو بھی فریق بنایا گیا ہے۔
اس کے علاوہ پنجاب اور خیبر پختونخوا کے وزرائے اعلیٰ سمیت الیکشن کمیشن آف پاکستان کو بھی فریق بنایا گیا ہے۔
درخواست میں پنجاب اور خیبر پختونخوا کی اسمبلیوں کی تحلیل اور نگران حکومتوں کی تشکیل کے تمام حقائق فراہم کئے گئے ہیں۔ اس کے علاوہ دستورِ پاکستان اور انتخابی قوانین کی متعلقہ بنیادوں کو بھی بیان کیا گیا ہے جبکہ درخواست دستور کے آرٹیکل 184 (3) کے تحت دائر کی گئی ہے۔
