پرتگال کے مشہورو معروف فٹ بال کھلاڑی کرسٹیانو رونالڈو کو سال 2024 کا سب سے مہنگا اتھلیٹ قرار دے دیا گیا ہے۔
’اسپورٹیکو‘ ویب سائٹ کی جانب سے جاری اعدادوشمار کے مطابق کرسٹیانو رونالڈو نے گزشتہ سال 260 ملین ڈالر کمائے۔ رپورٹ میں بتایا گیا ہے کہ رونالڈو کو تنخواہوں کی مد میں 215 ملین ڈالر دیے گئے جبکہ انہوں نے 45 ملین ڈالر مارکیٹنگ وغیرہ کے ذریعے کمائے۔
یہ بھی پڑھیے: ’النصر‘ سے نئے معاہدے کے بعد رونالڈو کی یومیہ آمدنی کتنے کروڑ ہوگی؟
واضح رہے کہ کرسٹیانو رونالڈو کو النصر کلب اور پرتگال کی قومی ٹیم کی طرف سے تنخواہیں دی جاتی ہیں۔
’اسپورٹیکو‘ کی فہرست میں دوسرے نمبر پر امریکی باسکٹ بال پلیئر اسٹیفن کیوری ہیں جنہوں نے گزشتہ سال 153 ملین ڈالر کمائے تاہم رونالڈو کی کمائی ان سے 100 ملین ڈالر سے زیادہ ہے۔
اس ویب سائٹ کی مہنگے ترین کھلاڑیوں کی فہرست میں پہلے 100 کھلاڑیوں میں کسی خاتون کھلاڑی کا نام شامل نہیں ہے جس کے بعد عالمی طور پر خواتین کی کھیلوں میں یکساں شراکت داری کو یقینی بنانے کے لیے اقدامات اور مواقعوں کی فراہمی کی کمی کو تنقید کا نشانہ بنایا جارہا ہے۔
