صدر پاکستان تحریک انصاف چوہدری پرویز الٰہی نے حکمران اتحاد کی جانب سے سپریم کورٹ کے خلاف منفی مہم کی مذمت کرتے ہوئے کہا ہے کہ حکمرانوں کو معاشی بحران کی فکر ہے نہ ان میں ملکی معاملات سدھارنے کی صلاحیت۔
لاہور میں صنعتکاروں، تاجر رہنماؤں اور سابق بلدیاتی نمائندوں سے خطاب کرتے ہوئے سابق وزیر اعلٰی پنجاب پرویز الٰہی کا کہنا تھا کہ پی ڈی ایم نے ہر ادارے کے خلاف محاذ کھول رکھا ہے۔ آئین شکن حکمران صرف اور صرف غیر آئینی طور پر اقتدار سے چمٹے رہنا چاہتے ہیں۔
چوہدری پرویز الٰہی کے مطابق اداروں کو متنازعہ بنانے کی مہم کے پیچھے ماسٹر مائنڈ نواز شریف ہے۔ تاریخ کے نااہل ترین حکمران انتخابات کا سامنا کرنے سے خوفزدہ ہیں۔ ملک میں سیاسی استحکام کے لیے انتخابات کے علاوہ کوئی اور طریقہ نہیں۔‘
پرویز الٰہی کا کہنا تھا کہ حکمران الیکشن سے بھاگنے کے لیے آئین شکنی کے مرتکب ہورہے ہیں۔ مقررہ آئینی مدت میں انتخابات میں ناکامی پر پنجاب اور خیبر پختونخواہ کی نگران حکومتوں کا اب کوئی آئینی جواز نہیں۔
’تحریک انصاف نگران حکومتوں کے معاملے پر سپریم کورٹ میں پٹیشن دائر کرچکی ہے اور اب عمران خان کی قیادت میں پی ٹی آئی بھر پور انتخابی مہم چلائے گی۔ عمران خان کی عوامی مقبولیت نے حکمرانوں کی نیندیں حرام کردی ہیں۔‘
پرویز الٰہی کے مطابق عوام شہباز شریف کو اب ایک نااہل ترین اور آئین شکن حکمران کے طور پر جانتی ہے۔ ’شہباز شریف کی ناقص گورننس سے اس بار عید پر غریب تو پریشان تھے ہی،صاحب حیثیت بھی حکومت کو کوستے نظر آئے۔ قوم کے لیے امید کی واحد کرن صرف عمران خان ہے۔‘
