سینیئر اداکارہ و ٹی وی میزبان نادیہ خان کا کہنا ہے کہ آج کل کے مارننگ شوز کی کوالٹی اتنی خراب تھی کہ لوگوں نے اسے دیکھنا بند کر دیا۔
نادیہ خان نے حال ہی میں ایک ٹی وی شو میں شرکت کی جہاں انہوں نے میزبان وسیم بادامی کے مختلف سوالات کے جواب دیے ایک سوال کا جواب دیتے ہوئے انہوں نے کہا کہ پاکستان میں اب مارننگ شوز کہاں ہیں اب ٹی وی چیلنز پر چند شوز ہی باقی رہ گئے ہیں۔
اداکارہ نے کہا کہ پہلے مارننگ شوز مقامی اور بین الاقوامی سطح پر دیکھے جاتے تھے اور لوگ ہمارے مارننگ شوز پر بحث کرتے تھے لیکن اب پر چینل کی اپنی کہانی ہے۔ ڈرامے ہر چینل پر غالب آ گئے ہیں اور وہ مارننگ شوز نہیں بنانا چاہتے کیونکہ وہ ڈراموں سے زیادہ پیسے کما رہے ہیں۔
نادیہ خان نے کہا کہ جب ہم معیار پر سمجھوتہ کرتے ہیں، تو لوگ معمولی مواد کے عادی ہو جاتے ہیں اور یہ ہر میدان میں ہوتا ہے۔ معیار پر سمجھوتہ کیا گیا تھا اور یہی وجہ ہے کہ لوگ پاکستان میں مارننگ شوز دیکھنا چھوڑ چکے ہیں۔
یہ بھی پڑھیں: ’یہ حسد کر رہی ہیں‘، نادیہ خان صارفین کے نشانے پر کیوں؟
انہوں نے مزید کہا کہ انہیں مارننگ شوز کی تنزلی پہلے ہی نظرآ رہی تھی۔ یہ اس وقت ہوا جب ہم نے ریٹنگز پر توجہ دینا شروع کی اور یہ ہمارے شوز کی موت تھی۔ ہم نے اپنے پروڈکٹ کے معیار پر سمجھوتہ کیا، اور یہی اس کی زوال کی وجہ بنی۔
یاد رہے نادیہ خان مارننگ شو ہوسٹ کرتی رہی ہیں اور اس کے علاوہ انہوں نے متعدد ڈراموں میں اداکاری کے جوہر بھی دکھائے ہیں جن میں ’ایسی ہے تنہائی‘، ’منزلیں‘، ’کمظرف‘، ’بندھن‘، ‘’کیسی عورت ہوں میں‘، ’دیس پردیس‘، ’ڈولی دارلنگ‘ اور دیگر شامل ہیں۔
یہ بھی پڑھیں: خلیل الرحمان قمر کے ساتھ ڈرامہ کرنے سے متعلق سوال پر نادیہ خان نے کیا جواب دیا؟
نادیہ خان اس وقت ایک مشہور اور متنازعہ ڈرامہ ریویو شو ’کیا ڈرامہ ہے‘ کی میزبانی کر رہی ہیں اور بہت جلد نیٹ فلکس کی آنے والی سیریز ’جو بچے ہیں سنگ سمیٹ لو‘ میں ںظر آئیں گی۔
