بھارتی ٹیلی ویژن کے مقبول ترین گیم شو ’کون بنے گا کروڑ پتی‘ کے بارے میں قیاس آرائیاں کی جا رہی ہیں کہ بالی ووڈ اداکارو میزبان امیتابھ بچن جو ’کون بنے گا کروڑ پتی‘ شو کی پہچان بن چکے ہیں اس شو سے الگ ہو رہے ہیں اور اب اگلے سیزن میں وہ بطور میزبان نظر نہیں آئیں گے۔
امیتابھ بچن کے شو سے الگ ہونے کے بارے میں کوئی باضابطہ تصدیق نہیں کی گئی لیکن ان افواہوں کے درمیان ایک سروے کیا گیا جس میں یہ جاننے کی کوشش کی گئی کہ امیتابھ بچن کے بعد ’کون بنے گا کروڑ پتی‘ کا نیا میزبان کون بن سکتا ہے۔
یہ بھی پڑھیں:امیتابھ بچن کی میزبانی میں ’کون بنے گا کروڑ پتی‘ کے نئے سیزن کا اعلان
سروے میں مختلف شخصیات کے نام سامنے آئے جن کے بارے میں قیاس آرائیاں کی جا رہی تھیں کہ وہ امتیابھ بچن کی جگہ لیں گے جن میں شاہ رخ خان، ایشوریا رائے بچن، مہندرا سنگھ دھونی، ہرشا بھوگلے، انیل کپور، مادھوری ڈکشٹ اور عامر خان شامل ہیں۔ اس سروے میں شاہ رخ خان اور ایشوریا رائے بچن کے نام سب سے مضبوط امیدوار کے طور پر سامنے آئے اور انہیں امیتابھ کی جگہ میزبانی کے لیے زیادہ پسند کیا گیا۔
امیتابھ بچن نے 2000 میں ’کون بنے گا کروڑ پتی‘ کی میزبانی کا آغاز کیا تھا اور اپنی منفرد پہچان بنائی تھی لیکن اس بارے میں ابھی تک باضابطہ اعلان نہیں کیا گیا کہ آیا یہ امیتابھ بچن کا آخری سیزن ہو گا یا نہیں اور اگر ایسا ہوتا ہے تو نیا میزبان شو کو اسی طور پر برقرار رکھ پائے گا یا نہیں۔
یہ بھی پڑھیں: ’کون بنے گا کروڑ پتی‘: امیتابھ بچن ایک قسط کا کتنا معاوضہ لے رہے ہیں؟
بالی وڈ کے میگا اسٹار امیتابھ بچن کی جانب سے حال ہی میں ٹویٹ کی گئی تھی جس میں انہوں نے کہا تھا کہ ’جانے کا وقت آ گیا ہے‘ اس ٹویٹ نے مداحوں کے درمیان کئی قیاس آرائیوں کو جنم دیا تھا۔
متعدد سوشل میڈیا صارفین کا ماننا تھا کہ لیجنڈری اداکار کی ٹوئٹ معروف شو’ کون بنے گا کروڑ پتی‘ سے ریٹائرمنٹ کا اشارہ ہے۔
واضح رہے کہ امیتابھ بچن نے 1969ء میں اپنے فلمی سفر کا آغاز کیا تھا اور وہ آج بھی بالی ووڈ کی کئی فلموں کا حصہ ہیں جو مختلف پروجیکٹس پر کام کر رہے ہیں۔
