ٹی وی اسکرین کے مقبول ترین ریئلٹی شو کون بنے گا کروڑ پتی ٹیلی ویژن کے 15 ویں سیزن کا اعلان کردیا گیا اور اس حوالے سے پرومو بھی جاری کردیا گیا ہے۔
میگا اسٹار امیتابھ بچن کی میزبانی میں ہونے والے پروگرام میں لوگوں کو نقد انعامات جیتنے کا موقع فراہم کیا جاتا ہے۔
کون بنے گا کروڑ پتی میں متعدد مشہور شخصیات بھی شرکت کرتی رہی ہیں۔ 14 کامیاب سیزن کے بعد اب حال ہی میں کون بنے گا کروڑ پتی کے 15ویں سیزن کا اعلان کیا گیا ہے جس میں ایک بار پھر بگ بی اس کی میزبانی کرنے کے لیے تیار ہیں۔
کون بنے گا کروڑ پتی کا 15واں پرومو
سونی ٹی وی نے اپنے آفیشل سوشل میڈیا ہینڈل پر کون بنے گا کروڑ پتی سیزن 15 کی رجسٹریشن کا اعلان کیا ہے۔ پرومو میں امیتابھ بچن کو شو کے مداحوں سے دوسرا سوال پوچھتے ہوئے دیکھا گیا۔ وہ کہہ رہے تھے کہ دوسرا سوال یہ ہے کہ ہندی فلم پٹھان کے ڈائریکٹر کون ہیں جس میں شاہ رخ خان ہیں؟ پرومو میں میزبان بگ بی نے یہ بھی بتایا کہ جوابات رات 9 بجے سے پہلے جمع کرائے جائیں گے۔
اس پرومو کے کیپشن میں لکھا ہے کہ پروگرام کی رجسٹریشن کے لیے یہ دوسرا سوال ہے جس کا جواب یکم مئی 2023 کو رات 9 بجے بھجوایا جائے۔
امیتابھ بچن کی قیادت میں شو شروع ہونے سے پہلے 15 دن تک مقابلہ کرنے والوں سے سوالات کیے جائیں گے۔ کون بنے گا کروڑ پتی 15 کی رجسٹریشن کی مدت 15 مئی 2023 تک ہے۔
امیتابھ بچن کوئز شو کے 14 کامیاب سیزن کی میزبانی کرچکے ہیں اور 15واں سیزن جلد ہی اسکرین پر واپس آئے گا۔ میزبان مقابلہ کرنے والوں کے ساتھ اپنی دلچسپ گفتگو کے لیے مشہور ہیں اور سامعین میں بہت زیادہ مقبول ہیں۔
لیجنڈری اداکار نے شو میں اپنی ذاتی زندگی کے بارے میں خبریں بھی شیئر کیں جنہیں ناظرین نے بہت پسند کیا۔ تاہم، کون بنے گا کروڑ پتی 15 کے پریمیئر کی تاریخ کا ابھی اعلان نہیں کیا گیا ہے۔
