پاکستانی سیاستدانوں کی جانب سے سال 2023 کے اداکردہ انکم ٹیکس ریکارڈ سے پتا چلتا ہے کہ سابق وزیر اعظم نواز شریف نے 2023 میں صرف 82 ہزار روپے جبکہ سابق وزیر اعظم عمران خان نے 32 لاکھ روپے انکم ٹیکس ادا کیا تھا۔
دوسری جانب اسی برس موجودہ وزیر اعلیٰ پنجاب مریم نواز نے ایک لاکھ 17 ہزار روپے سے زائد، چیئرمین پاکستان پیپلز پارٹی بلاول بھٹو نے 58 لاکھ روپے جبکہ لیگی رہنما حمزہ شہباز نے ایک لاکھ 39 ہزار روپے سے زائد انکم ٹیکس ادا کیا تھا۔
یہ بھی پڑھیں:تنخواہ دار طبقے کو 7 ماہ میں کتنے ارب روپے اضافی انکم ٹیکس ادا کرنے پر مجبور کیا گیا؟
عام انتخابات 2024 کے نامزدگی فارمز میں سیاستدانوں کے بیان کردہ اعدادوشمار کے مطابق قومی اسمبلی میں اپوزیشن لیڈر عمر ایوب نے 2023 میں کل انکم ٹیکس کے طور پر صرف 37 لاکھ 9 ہزار روپے سے زائد رقم ادا کی۔
جبکہ پی ٹی آئی کے سابق اسپیکر قومی اسمبلی اسد قیصر نے 15 لاکھ 70 ہزار روپے اور چیئرمین پی ٹی آئی عمران خان نے 2023 کے مجموعی طور پر انکم ٹیکس کی مد میں 32 لاکھ روپے قومی خزانے میں جمع کرائے تھے۔
مزید پڑھیں:سندھ: زرعی انکم ٹیکس بل 2025 منظور، کس پر کتنا ٹیکس لگے گا؟
عام انتخابات 2024 کے نامزدگی فارمز میں سیاستدانوں کے بیان کردہ اعدادوشمار کے مطابق حمزہ شہباز شریف نے 139,928 روپے، اسپیکر قومی اسمبلی ایاز صادق نے 15 لاکھ روپے اور وفاقی وزیر عطاء اللہ تارڑ نے 2023 کے لیے 356256 روپے کل انکم ٹیکس ادا کیا۔
اس کے علاوہ وفاقی وزیر علیم خان نے 2 کروڑ 10 لاکھ روپے، مسلم لیگ کے موجودہ وزیر ریلوے حنیف عباسی نے 44 لاکھ روپے جبکہ پی ٹی آئی کے رکن قومی اسمبلی لطیف کھوسہ نے 2023 میں 15 لاکھ روپے انکم ٹیکس ادا کیا تھا۔
مزید پڑھیں:انکم ٹیکس گوشوارے جمع کرانے والوں کی تعداد 35 لاکھ 80 ہزار ہوگئی: ایف بی آر
اس نمائندے کی جانب سے عام انتخابات 2024 کے کاغذات نامزدگی سے جمع کیے گئے اعداد و شمار کے مطابق نواز شریف نے 2023 میں کل ساڑھے 3 لاکھ روپے سے زائد زرعی انکم ٹیکس اور 82 ہزار روپے سے کچھ زائد انکم ٹیکس ادا کیا۔
تین مرتبہ کے سابق وزیر اعظم نے 229313 روپے اور کل انکم ٹیکس کے طور پر 136283 روپے کل زرعی انکم ٹیکس ادا کیا، نواز شریف کی جانب سے 2022 اور 2021 میں ادا کیے جانے والے کل انکم ٹیکس بالترتیب 2121 روپے اور 23,956 روپے تھے۔
