عید کے موقع پر ہر کسی کی یہ خواہش ہوتی ہے کہ وہ عید آبائی علاقے میں اپنوں کے درمیان عید منائے، کراچی میں روزگار کے لیے آئے پورے پاکستان سے شہری بھی کوشش کرتے ہیں کہ عید اپنے اپنے آبائی علاقوں میں منائیں۔
صاحب حیثیت جہاز کے ذریعہ یہ سفر کرتے ہیں، عام شہری بذریعہ ٹرین یا روڈ اپنی منزل کی طرف جاتے ہیں، اور ان کو پہنچانے والے ڈرائیور ہوتے ہیں جو دن رات ایک کرکے لوگوں کو ان کے اپنوں تک پہنچانے کی کوشش کرتے ہیں۔ ایسے ہی ایک ڈرائیور ثناء اللہ خان ہیں جو کراچی سے پنجاب تک بس چلاتے ہیں اور گزشتہ 25 برس سے ڈرائیونگ سے جڑے ہیں۔ ان کا کہنا ہے کہ ہمارا کچھ پتا نہیں ہوتا کہ عید کہاں آجائے، لیکن کوشش ہوتی ہے کہ شہریوں کو ان کے علاقوں تک پہنچائیں تا کہ وہ اپنوں میں عید مناسکیں۔
ڈرائیور ثناء اللہ خان کے مطابق وہ ہمیشہ تیار رہتے ہیں اور اکثر عید اپنوں سے دور منانی پڑتی ہے جس کے لیے ان کے پاس کپڑے موجود رہتے ہیں۔ ان کا مزید کہنا تھا کہ لمبے روٹ کے لیے ہم عطاء اللہ خان عیسی خیلوی کے گانے سنتے ہیں۔
