عید کے دنوں میں ہر کوئی عید انجوائے کرنے شہر سے باہر اپنے پیاروں کے ساتھ عید کرنے یا پھر شمالی علاقہ جات میں سیر و تفریح کے لیے نکل جاتا ہے۔ ایسے میں ہر شخص موسم کی صورتحال کے حوالے سے کافی زیادہ فکرمند رہتا ہے۔
آئیے جانتے ہیں اس بار عید پر موسم کیسا رہنے کا امکان ہے؟
عید کے دنوں میں موسم کے حوالے سے ڈائریکٹر جنرل صاحبزاد خان نے بتایا کہ عید کے دنوں میں موسم خشک رہنے کا امکان ہے۔ لیکن بعض مقامات پر ہلکے بادل آنے کے بھی امکانات ہیں جیسے شمالی علاقہ جات اور اسلام آباد کے گردونواح۔
انہوں نے مزید کہا کہ اب بھی جو بادل ہیں، ان کا اثر اتنا زیادہ نہیں ہوگا کہ عید کا چاند ہی نظر نہ آئے۔ عید کے دنوں میں موسم معتدل ہی رہے گا۔ تھوڑا سا ٹمپریچر بڑھے گا۔ باقی فی الحال اگلے ہفتے موسم کی شدت کا کوئی امکان نہیں ہے۔ گرما کی شدت کے امکانات اپریل کے وسط کے بعد ہوں گے۔
اسلام آباد میں پریس کانفرنس کرتے ہوئے چیف میٹرولوجسٹ محمد افضال نے کہا کہ عید کے دنوں میں ملک کے میدانی علاقوں میں درجہ حرارت 2 سے 3 ڈگری زیادہ ہو سکتا ہے، آئندہ ہفتوں میں بھی ملک بھر میں دن کے وقت درجہ حرارت زیادہ رہنے کا امکان ہے۔
انہوں نے بتایا کہ سندھ میں بارشیں معمول سے 63 فیصد کم ہوئی ہیں، پنجاب اور خیبر پختونخوا میں معمول سے 41 فیصد کم بارشیں ہوئیں، آگے بھی ہم بارشیں بہت کم دیکھ رہے ہیں۔ انہوں نے مزید کہا کہ ہم نے خشک سالی سے متعلق ایک الرٹ بھی جاری کیا ہے، فصلوں کے لیے پانی کم ہوگا جو زراعت کو متاثر کرے گا۔ جنگلی حیات پر بھی منفی اثرات ہوں گے۔ پانی کی کمی سے بیماریاں بھی متوقع ہیں۔
البتہ درجۂ حرارت میں اضافے سے گلیشئرز پگھلیں گے، تربیلا اور منگلا ڈیموں میں ذخیرہ شدہ پانی کی شدید قلت ہے۔
انہوں نے مزید کہا کہ راولپنڈی اور اسلام آباد میں زیرِ زمین پانی 150 فٹ تک نیچے چلا گیا ہے، بارشیں نہ ہونے پر جڑواں شہروں میں 150 فٹ تک کے بور بھی خشک ہونے کا خطرہ ہے۔
