کراچی چڑیا گھر سے ’مدھو بالا ہتھنی‘ کی سفاری پارک منتقلی کے لیے انکلوژر تعمیر کرنے کے لیے ڈیزائن تیار کر لیا گیا ہے۔
سفاری پارک میں مدھو بالا کا انکلوژر سونیا اور ملکہ کے انکلوژر کے سامنے تعمیر کیا جائے گا۔ سفاری پارک میں ہتھنیوں کی سینچری کے لے 17.25 ایکڑ رقبہ وقف کیا گیا ہے ۔
سفاری پارک میں ملکہ سونیا اور مدھو بالا کے لیے 5.50 ایکڑ رقبہ مختص کیا گیا ہے۔ پارک میں ہتھنیوں کے لیے 3.25 ایکڑ رقبہ پر ایلیفینٹ پلے ایریا بنایا جائےگا۔
ہتھنیوں کی سینچری میں 8.5 ایکڑ رقبہ پر پانی اور درخت لگائے جائیں گے۔ مدھو بالا ہتھنی کے لیے 25 فٹ اونچا اور 38فٹ لمبا اور چوڑا انکلوژر تعمیر کیا جائے گا۔ مدھو بالا کا انکلوژر آئرن اور فائبر سے تیار کیا جائے گا۔
سفاری پارک میں ایلیفینٹ پلے ایریا کے ساتھ پانی کے حوض کے لیے ہنگامی بنیادوں پر اقدامات آج سےشروع کیے جائیں گے۔
ڈائریکٹر چڑیا گھر و سفاری پارک کنور ایوب کو 45 روز میں مدھو بالا کا گھر تعمیر کرنے کی ہدایات دی گئی ہیں۔ کراچی چڑیا گھر سے مدھو بالا کو جون کے وسط تک سفاری پارک میں منتقل کردیا جائے گا۔
Elephant Noor Jehan critically ill at Karachi Zoo after fall#NoorJahan #KarachiZoo #AnimalRights pic.twitter.com/jpBkyzcKYX
— Pakistani Fashion Online (@PFOPakistan) April 18, 2023
واضح رہے کہ اس سے قبل ایک ہاتھی جس کا نام کاون تھا اس کو تنہائی کے باعث کمبوڈیا منتقل کر دیاگیا تھا۔ 36 سالہ ہاتھی کاون کو ایک سال کی عمر میں 1985 میں سری لنکن حکومت نے اس وقت کے صدر پاکستان جنرل ضیاالحق کو تحفہ میں پیش کیا تھا۔
اس وقت اسلام آباد ہائی کورٹ کے چیف جسٹس اطہر من اللہ نے کہا تھا کہ ہاتھی کو اذیت ناک حالت میں رکھا گیا ہے اس لیے اسے مناسب پناہ گاہ میں منتقل کرنے کا انتظام کیا جائے۔
اس کے علاوہ اسلام آباد کے مرغزار چڑیا گھر سے لاہور منتقلی کے دوران ایک شیر بھی ہلاک ہو گیا تھا اور میڈیکل رپورٹ میں یہ بات سامنے آئی تھی کہ شیر کی ہلاکت بھوک، پیاس اور دم گھٹنے کے باعث ہوئی ہے۔
