پاکستان تحریک انصاف کے سینیئر رہنما فواد چوہدری نے پنجاب اور خیبر پختونخوا اسمبلیاں بحال کرنے کے لیے پٹیشن دائر کرنے کی خبروں کی تردید کر دی ہے۔
سماجی رابطے کی ویب سائٹ ٹوئٹر پر اپنے بیان میں فواد چوہدری کا کہنا تھا کہ جمعہ کی صبح سے میڈیا پر خبریں چل رہی ہیں کہ تحریک انصاف کے سابق وزرائے اعلیٰ نے صوبائی اسمبلیاں بحال کرنے کے لیے پٹیشن دائر کر دی ہے۔
ہمارے میڈیا کا یہ حال ہے کہ صبح سے چل رہا ہے کہ تحریک انصاف کے وزراء اعلی نے پیٹیشن دائرکر دی ہے کہ صوبائ اسمبلیاں بحال کر دیں، پوچھیں یہ پیٹیشن کہاں داخل ہوئ ہیں کسی کو پتہ نہیں کس قانون کے تحت اسمبلیاں بحال ہو سکتی ہیں کوئ پتہ نہیں، لیکن مجال ہے کوئ معمولی تحقیق ہی کر لے
— Ch Fawad Hussain (@fawadchaudhry) April 28, 2023
انہوں نے سوال اٹھایا کہ ایسا کہنے والوں سے پوچھیں کہ وہ پٹیشن کہاں داخل ہوئی ہے؟ کس قانون کے تحت اسمبلیاں بحال ہو سکتی ہیں کسی کو کچھ نہیں پتہ۔
فواد چوہدری نے تنقید کرتے ہوئے کہا کہ مجال ہے کہ خبر چلانے سے پہلے کوئی تحقیق ہی کر لے۔
واضح رہے کہ جمعہ کے روز میڈیا پر خبریں نشر ہوئی تھیں کہ پنجاب اور خیبر پختونخوا کے سابق وزرائے اعلیٰ نے اسمبلیوں کی بحالی کے لیے پٹیشن دائر کر دی ہے جس کے بعد لوگ سوشل میڈیا پر مختلف سوالات اٹھا رہے تھے۔ اب فواد چوہدری نے اپنے ٹوئٹ کے ذریعے اس گتھی کو سلجھا دیا ہے۔
