سابق وزیراعلیٰ پنجاب اور صدر تحریک انصاف چوہدری پرویز الٰہی کی رہائش گاہ پر گزشتہ شب پولیس اور اینٹی کرپشن کی ٹیم نے چھاپا مار کارروائی کے دوران گھر سے متعدد افراد کو حراست میں لے لیا ہےجبکہ سابق وزیر اعلیٰ پنجاب کے خلاف مقدمہ درج کرلیا گیا۔
گزشتہ رات لاہور پولیس اور اینٹی کرپشن ٹیم نے چوہدری پرویز الٰہی کو گرفتار کرنے کے لیے ان کی رہائش گاہ پرچھاپا مارا، تاہم 8 گھنٹے طویل آپریشن کے باوجود انہیں گرفتار کرنے میں ناکام رہی ۔ البتہ کارروائی کے دوران صدر تحریک انصاف کے گھر سے متعدد افراد کو حراست میں لے لیا جبکہ سابق وزیر اعلیٰ پنجاب کے خلاف مقدمہ درج کرلیا گیا۔
کارکنان کی گرفتاری کے وقت ظہور الٰہی روڈ کے اطراف میں سادہ لباس میں ملبوس پولیس اہلکار بھی موجود رہے۔
دہشتگردی کی دفعات کے تحت مقدمہ درج
لاہور کے تھانہ غالب مارکیٹ میں چوہدری پرویز الٰہی سمیت 50 افراد کے خلاف پولیس پر تشدد اور حملہ کرنے کے الزام میں مقدمہ درج کرلیا گیا۔اینٹی کرپشن افسر کی مدعیت میں دہشتگردی کی دفعات کے تحت یہ مقدمہ درج کیا گیا ہے۔ کیس میں دہشت گردی اور اقدام قتل سمیت 13 دفعات لگائی گئی ہیں۔
مقدمے کے متن کے مطابق چھاپہ مار ٹیم پر جلانے کی نیت سے پٹرول پھینکا گیا، پتھراؤ کیا گیا، ڈنڈوں سے حملہ کیا گیا، جبکہ چوہدری پرویز الٰہی کو موقع سے فرار کرا دیا گیا۔
ایک طرف مذاکرات دوسری طرف گرفتاریاں؟ چوہدری پرویز الہی کے گھر چھاپہ سے ثابت ہوتا ہے کہ اسحق ڈار، سعد رفیق اور اعظم تارڑ کی اپنی حکومت میں کوئ حیثیت نہیں ، اس چھاپے کی شدید مذمت کرتے ہیں
— Ch Fawad Hussain (@fawadchaudhry) April 28, 2023
چوہدری پرویز الٰہی کی قانونی ٹیم بشمول ان کے وکیل عامر سعید نے سرکاری عہدیدار کو پی ٹی آئی رہنما کے خلاف متعدد مقدمات میں عدالت کی جانب سے دی گئی ضمانتوں سے آگاہ کیا مگر چھاپہ مار اہلکار نے عدالت کے حکم کو ماننے سے انکار کردیا اور چوہدری پرویز الٰہی پر حملے اور نظر بندی کے اپنے منصوبے کو جاری رکھنے کا سہارا لیا۔
پولیس اور اینٹی کرپشن کی ٹیم جمعے کے روز گوجرانوالہ میں ہونے والے مقدمے میں پرویز الٰہی کی گرفتاری کے لیے پہنچی جہاں لیگل ٹیم کی جانب سے ان کو بتایا گیا ہے کہ پرویز الٰہی نے اس مقدمے میں عبوری ضمانت حاصل کرلی ہے۔
فاشسٹ حکومت طاقت کے نشے میں اندھی ہوگئی پرویز الہی صاحب کے گھر پر حملہ کردیا گیا ہے۔ گھر کے دروازے توڑے جارہے ہے چادر اور چار دیواری کا تقدس پامال کیا جارہا ہے۔
پرویز الہی نے پنجاب اسمبلی تحلیل کردی تھی اس کی سزا انکو دی جارہی ہے۔ @MoonisElahi6 pic.twitter.com/lKAvF4MwQb— Farrukh Habib (@FarrukhHabibISF) April 28, 2023
یاد رہے کہ جمعے کے روز اینٹی کرپشن گوجرانوالہ نے پرویز الٰہی کے خلاف مقدمہ درج کیا تھا جس کے بعد سابق وزیراعلیٰ نے عبوری ضمانت حاصل کر لی۔
اینٹی کرپشن عدالت کے جج نے سماعت کرتے ہوئے 6 مئی تک اینٹی کرپشن کو پرویز الٰہی کی گرفتاری سے روک دیا تھا۔
دوسری جانب اینٹی کرپشن کی ٹیم کی جانب سے پرویز الٰہی کی لیگل ٹیم سے مطالبہ کیا گیا کہ ہمیں جج کے ضمانت آرڈر دکھائے جائیں۔
میڈیا رپورٹس کے مطابق لاہور میں پولیس اہلکاروں نے اس کارروائی کے دوران سابق وزیر اعلیٰ پنجاب پرویز الٰہی کے گھر سے متعدد افراد کو حراست میں لے لیا ہے۔
Ch Pervaiz Elahi has got the bail from court today so why is police illegally entering his house to arrest him? Every day human rights are being violated by this shameful regime! pic.twitter.com/B2U24OaVzs
— PTI (@PTIofficial) April 28, 2023
اس حوالے سے پی ٹی آئی کے مرکزی رہنما فواد چوہدری نے اپنی ایک ٹوئٹ میں کہا ہے کہ ’ایک طرف مذاکرات دوسری طرف گرفتاریاں؟ چوہدری پرویز الہی کے گھر چھاپے سے ثابت ہوتا ہے کہ اسحق ڈار، سعد رفیق اور اعظم تارڑ کی اپنی حکومت میں کوئی حیثیت نہیں، اس چھاپے کی شدید مذمت کرتے ہیں‘۔
پی ٹی آئی کے رہنما فرح حبیب نے اپنی ٹوئٹ میں کچھ ویڈیوز شیئر کرتے ہوئے لکھا کہ ’فاشسٹ حکومت طاقت کے نشے میں اندھی ہوگئی اور پرویز الہی صاحب کے گھر پر حملہ کردیا گیا ہے۔ گھر کے دروازے توڑے جارہے ہے چادر اور چار دیواری کا تقدس پامال کیا جارہا ہے۔ پرویز الہی نے پنجاب اسمبلی تحلیل کردی تھی اس کی سزا ان کو دی جارہی ہے‘۔
سابق وزیر اعلیٰ پرویز الٰہی کے ترجمان کے مطابق پنجاب پولیس نے اینٹی کرپشن افسران کے ہمراہ پی ٹی آئی کے صدر اور سابق وزیر اعلیٰ پنجاب چوہدری پرویز الٰہی کی لاہور میں رہائش گاہ پر چھاپہ مارا ہے۔ پولیس پی ٹی آئی رہنما کے خلاف اپنی انتہائی قابل مذمت کارروائی میں طاقت کا استعمال کرتے ہوئے املاک کو نقصان پہنچانے کے ساتھ خوف و ہراس کو فروغ دے رہی ہے۔
ترجمان کا کہنا ہے کہ پی ٹی آئی اپنے صدر کے خلاف طاقت کے اس وحشیانہ استعمال کی مذمت کرتی ہے اور صوبائی حکومت سے مطالبہ کرتی ہے کہ وہ اس غیر قانونی اقدام کو روکے۔
