اٹلی میں مصنوعی ذہانت پر مبنی ایپ چیٹ جی پی ٹی پر لگائی گئی پابندی کو ہٹا دیا گیا ہے۔
اٹلی کی ڈیٹا پروٹیکشن اتھارٹی نے پرائیویسی کے خدشات کے پیش نظر رواں سال اپریل کے آغاز میں چیٹ جی پی ٹی پر پابندی لگا دی تھی۔
اس ایپ کو بنانے والی کمپنی اوپن اے آئی جسے مائیکروسافٹ کی حمایت حاصل ہے نے کہا ہے کہ اس نے اٹلی کی جانب سے اٹھائے گئے اعتراضات کو ختم کر دیا ہے۔
اطالوی ڈیٹا پروٹیکشن اتھارٹی جسے گارانٹے کے نام سے بھی جانا جاتا ہے نے عارضی طور پر چیٹ جی پی ٹی پر پابندی عائد کی تھی اور مصنوعی ذہانت کی ایپلی کیشن کی مشتبہ خلاف ورزی پر تحقیقات کا آغاز کیا تھا۔
گارانٹے نے کمپنی پر الزام لگایا تھا کہ وہ چیٹ جی پی ٹی کے صارفین کی عمر کی جانچ کرنے میں ناکام رہا ہے جس کی وجہ سے 18 سال سے کم عمر افراد بھی اس تک آسانی سے رسائی حاصل کر رہے ہیں تاہم کمپنی نے اس اعتراض پر ایپ میں ایک نیا ٹول متعارف کرایا ہے جس سے اب سائن اپ کرنے پر اٹلی میں صارفین کی عمروں کی تصدیق ہو سکے گی۔
گارانٹے نے کمپنی کے نافذ کردہ اس اقدام کا خیر مقدم کیا ہے اور اس پر سے پابندی ہٹا دی ہے۔
کمپنی کا کہنا ہے کہ گارانٹے کے تعاون پر شکر گزار ہیں تاہم تعمیری بات چیت کا سلسلہ جاری رہے گا۔
واضح رہے کہ نومبر 2022 میں لانچ ہونے کے بعد سے لاکھوں لوگوں نے اس ایپ کو استعمال کیا ہے۔
یہ ایپ انسان جیسی زبان کا استعمال کرتے ہوئے سوالات کے جوابات دیتی ہے۔ مائیکروسافٹ نے اس پر اربوں ڈالر خرچ کیے ہیں۔
