متحدہ عرب امارات کے نائب وزیراعظم شیخ عبداللہ بن زاید النہیان 2 روزہ سرکاری دورے پر پاکستان پہنچ گئے ہیں جہاں وہ وزیراعظم شہباز شریف سے بھی ملاقات کریں گے۔
پاکستان کے نائب وزیراعظم و وزیرخارجہ اسحاق ڈار نے شیخ عبداللہ بن زاید النہیان کا دفتر خارجہ میں استقبال کیا اور انہیں پاکستان میں خوش آمدید کہا۔
یہ بھی پڑھیے: متحدہ عرب امارات اور پاکستان کے درمیان مختلف شعبوں میں تعاون کے معاہدے طے پاگئے
شیخ عبداللہ بن زاید النہیان نے پاکستان کے ساتھ تجارت، سرمایہ کاری اور ہوا بازی سمیت مختلف شعبوں میں تعلقات کو مستحکم کرنے کے عزم کا اظہار کیا۔
اسحاق ڈار سے ملاقات میں انہوں نے خوشی کا اظہار کیا کہ دونوں ممالک کے درمیان تعلقات تیزی سے ترقی کر رہے ہیں۔ انہوں نےکہا کہ پچھلے ایک سال کے دوران دوطرفہ معاملات تیزی سے آگے بڑھ رہے ہیں۔
شیخ عبداللہ بن زاید النہیان نے کہا کہ پاکستان ہمارے دلوں کے قریب ہے، دونوں ممالک کے رہنما اور عوام اس تعلق کو مزید ترقی دینا چاہتے ہیں۔
Deputy Prime Minister/Foreign Minister Senator Mohammad Ishaq Dar @MIshaqDar50, recieved the Deputy Prime Minister and Minister of Foreign Affairs of UAE, Sheikh Abdullah bin Zayed al Nahyan @AbZayed at MoFA today. pic.twitter.com/9njCpvvUbV
— Ministry of Foreign Affairs – Pakistan (@ForeignOfficePk) April 21, 2025
اس موقع پر نائب وزیراعظم اسحاق ڈار کا کہنا تھا کہ دونوں ممالک کے درمیان قدیم بھائی چارے کے تعلقات ہیں اور ان کے عوام کے درمیان محبت موجود ہے۔ انہوں نے کہا کہ ہم اپنے دونوں ممالک کے مفاد اور بہبود کے لیے مل کر کام کر رہے ہیں۔
اس موقع پر ایک تقریب میں دونوں ممالک کے درمیان مفاہمتی یادداشتوں پر دستخط کیے گئے۔
دونوں نائب وزرائے اعظم نے ثقافت کے شعبے میں تعاؤن اور قونصلر امور کے لیے مشترکہ کمیٹی کے قیام کی یادداشت پر دستخط کیے۔
یہ بھی پڑھیے: متحدہ عرب امارات کے نائب وزیراعظم 2 روزہ دورے پر پاکستان پہنچ گئے
اس کے علاوہ مشترکہ بزنس کونسل کے قیام کی یاددات پر بھی دستخط ہوئے۔
نائب وزیراعظم شیخ عبداللہ بن زاید النہیان کے دورے کے دوران دوطرفہ تعلقات، تجارت اور سرمایہ کاری، توانائی کے شعبے میں تعاون، علاقائی سلامتی اور لوگوں کے درمیان روابط کے لیے اقدامات کا جائزہ لیا جائے گا۔
یہ دورہ دونوں جانب کے نمائندوں کو باہمی دلچسپی اور تشویش کے علاقائی و عالمی صورتحال پر اپنے خیالات کے تبادلے کا موقع بھی فراہم کرے گا۔
وزارت خارجہ کے پریس ریلیز کے مطابق ہزہائینس شیخ عبداللہ بن زاید النہیان کا یہ دورہ پاکستان اور یو اے ای کے دیرینہ تعلقات کو مزید مستحکم کرے گا اور متنوع شعبوں میں دوطرفہ تعلقات کو فروغ دینے میں مددگار ثابت ہوگا، جس کا فائدہ دونوں ممالک کے عوام کو ہوگا۔
