چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے کہا ہے کہ چین خطے کی سیکیورٹی صورت حال میں استحکام کا ضامن ہے۔
پاک فوج کے شعبہ تعلقات عامہ (آئی ایس پی آر) کے مطابق جنرل ساحر شمشاد مرزا نے عوامی جمہوریہ چین کی پیپلز لبریشن آرمی کے 98ویں یومِ تاسیس کی یادگاری تقریب میں بطور مہمانِ خصوصی شرکت کی، جہاں انہوں نے چینی صدر شی جن پنگ کی قیادت کو سراہا۔
یہ بھی پڑھیں: پاکستان کا چین سے مزید طیارے و دفاعی سسٹم خریدنے کا ارادہ، چینی کمپنیوں کے شیئرز بڑھ گئے، بلومبرگ کی رپورٹ
تقریب میں سول و عسکری حکام، میڈیا نمائندگان، کاروباری رہنماؤں اور سول سوسائٹی کے اراکین نے شرکت کی، جو پاک چین دوستی کے لیے وسیع حمایت کا مظہر تھی۔
اس موقع پر چیئرمین جوائنٹ چیفس نے چین کے عوام، عسکری قیادت اور پیپلز لبریشن آرمی کے تمام افسران و جوانوں کو دلی مبارکباد پیش کی اور صدر شی جن پنگ کی بصیرت افروز قیادت میں چین کی حیران کن ترقی اور تیز رفتار جدیدیت میں پی ایل اے کے کلیدی کردار کو سراہا۔
انہوں نے چین کو خطے کی سیکیورٹی صورتحال میں استحکام کا ضامن قرار دیا اور اپنے خطاب میں پاکستان اور چین کے درمیان دیرینہ، آزمودہ اور فولادی دوستی کا اعادہ کیا۔
جنرل ساحر شمشاد مرزا نے کہا کہ دونوں ممالک اس منفرد رشتے کو ہر شعبے میں مزید وسعت دینے اور مستحکم کرنے کے لیے پُرعزم ہیں۔
یہ بھی پڑھیں: چینی فضائیہ کا ملٹی ڈومین آپریشنز میں پاک فضائیہ کے تجربے سے سیکھنے میں دلچسپی کا اظہار
انہوں نے پاکستان میں کام کرنے والے چینی شہریوں کی سیکیورٹی کے لیے پاکستان کے غیر متزلزل عزم، سی پیک منصوبے کی پیشرفت، دفاعی تعاون کے فروغ اور علاقائی ہم آہنگی و ترقی کے لیے مشترکہ کوششوں پر بھی زور دیا۔
