کیتھولک مسیحیوں کے روحانی پیشوا پوپ فرانسس کے انتقال کے بعد نئے پوپ کے انتخاب کے لیے اقدامات جاری ہیں، ایسے میں امریکی صدر ڈونلڈ ٹرمپ نے پوپ کے لباس میں اپنی تصویر شیئر کرکے نیا تنازع کھڑا کردیا۔
غیرملکی میڈیا رپورٹس کے مطابق صدر ٹرمپ نے گزشتہ ہفتے ہی مذاق میں صحافیوں سے گفتگو کرتے ہوئے کہا تھا کہ وہ نیا پوپ بننا چاہیں گے اور اب سوشل میڈیا اکاؤنٹ پر پوپ کے لباس میں تصویر پوسٹ کردی۔
یہ بھی پڑھیں نئے پوپ کے انتخاب کے لیے کارڈینلز کا اجتماع کب ہوگا؟
ڈونلڈ ٹرمپ نے پوپ کا روایتی لباس زیب تن کیے ہوئے یہ تصویر سوشل میڈیا پر شیئر کی۔
تصویر میں دیکھا جا سکتا ہے کہ ڈونلڈ ٹرمپ کے گلے میں صلیب کا طلائی لاکٹ میں لٹک رہا ہے اور ایسا محسوس ہوتا ہے کہ جیسے وہ منصب پر فائز ہو چکے ہیں۔
میڈیا رپورٹس میں کہا گیا ہے کہ دراصل ٹرمپ کی جانب سے شیئر کی گئی یہ تصویر مصنوعی ذہانت سے بنائی گئی ہے۔
سوشل میڈیا صارفین ٹرمپ کی اس حرکت کو انتہائی نامناسب قرار دیتے ہوئے ان پر تنقید کررہے ہیں، اور کہا جارہا ہے کہ ایسا اقدام کسی کے مذہبی مقدسات کی توہین کے مترادف ہے۔
یہ بھی پڑھیں آنجہانی پوپ کو ویٹیکن میں کیوں دفن نہیں کیا گیا؟ 100 سالہ روایت کیوں توڑی گئی؟
یاد رہے کہ گزشتہ ماہ 21 اپریل کو پوپ فرانسس کا انتقال ہوگیا تھا، اور اب ان کے جانشین کے انتخاب کے لیے کارڈینلز کا اجلاس جاری ہے۔
