عالمی سطح پر ڈیجیٹل ٹرینڈز کے بارے میں اعداد وشمار پیش کرنے والی ویب سائٹ ڈیٹا رپورٹل کی طرف سے ’ڈیجیٹل 2025ء: گلوبل اوور ویو رپورٹ‘ کے اعداد وشمار جاری کردیے گئے۔
رپورٹ کے مطابق فروری 2025 تک دنیا بھر میں 5.56 ارب افراد انٹرنیٹ یوزر تھے جو عالمی آبادی کا 67.9 فیصد بنتا ہے۔
یہ بھی پڑھیں: فیس بک نے مونیٹائزیشن پالیسی سخت کردی
مذکورہ رپورٹ میں بتایا گیا کہ ان میں سے 5.24 ارب سوشل میڈیا صارفین تھے جو دنیا کی 63.9 فیصد آبادی بنتی ہے۔
رپوٹ کے مطابق فروری سنہ 2025 میں سب سے مقبول سوشل میڈیا پلیٹ فارم فیس بک تھا اور اسے استعمال کرنے والے صارفین کی تعداد 3.07 بلین رہی۔
واضح رہے کہ فیس بک پہلا سوشل نیٹ ورک ہے جس نے ایک ارب رجسٹرڈ اکاؤنٹس کو عبور کیا تھا اور اس وقت اس کے ماہانہ فعال صارفین کی تعداد 3 ارب سے زائد ہے۔
میٹا نیٹ ورک 4 بڑے سوشل میڈیا پلیٹ فارمز کا مالک ہے جن میں فیس بک (بنیادی پلیٹ فارم)، واٹس ایپ، فیس بک میسنجر اور انسٹاگرام شامل ہیں۔ ان میں سے ہر ایک پلیٹ فارم کے یوزر کی تعداد ایک ارب سے زائد ہے۔
صارفین کی تعداد کے لحاظ سے دوسرا سب سے مقبول سوشل میڈیا پلیٹ فارم یو ٹیوب تھا جس کے یوزرز کی تعداد 2.53 بلین تھی۔
مزید پڑھیے: گوگل، فیس بک اور واٹس ایپ پاکستان سے کتنا کماتے ہیں اور کتنا ٹیکس دیتے ہیں؟
انسٹاگرام اور واٹس ایپ 2 بلین یوزرز کے ساتھ تیسرے اور چوتھے نمبر پر ہیں جبکہ ٹک ٹاک 1.59 بلین صارفین کے ساتھ 5ویں نمبر پر رہا۔
مزید پڑھیں: بھارت نے 16 پاکستانی یوٹیوب چینلز پر پابندی لگادی، مگر کیوں؟
صارفین میں سب سے زیادہ مقبول سوشل نیٹ ورکس کی مالک کمپنیوں کا تعلق امریکا سے ہے جن کے صارفین کی تعداد ایک ارب سے زائد ہے۔
تاہم چینی سوشل نیٹ ورکس جیسے وی چیٹ، کیو کیو یا پھر ویڈیو شیئرنگ ایپ ڈویِن بھی اس دوڑ میں شامل ہیں جو مقامی سیاق و سباق اور مواد کی وجہ سے صارفین کی بڑی تعداد میں مقبول ہیں۔ ٹک ٹاک دنیا کا 5 واں مقبول ترین سوشل پلیٹ فارم ہے۔
