سیکیورٹی فورسز نے شمالی وزیرستان کے ضلع میران شاہ کے علاقے میں دہشت گردوں کی موجودگی کی اطلاع پر آپریشن کیا ہے اور اس دوران حافظ گل بہادر گروپ سے تعلق رکھنے والے دہشت گرد کمانڈر مہتاب عرف لالہ سمیت 7 دہشت گردوں کو کامیابی سے گرفتار کرلیا گیا۔
انٹر سروسز پبلک ریلیشنز (آئی ایس پی آر) نے بتایا ہے کہ گرفتار دہشت گرد دہشت گردی کی متعدد کارروائیوں میں ملوث رہے ہیں۔
دہشت گرد سیکیورٹی فورسز کے ساتھ معصوم شہریوں کے قتل میں مصروف رہے اور سیکیورٹی اداروں کو انتہائی مطلوب تھے۔
علاقے کے مقامی لوگوں نے سیکیورٹی فورسز کی کارروائی کو سراہا اور دہشت گردی کی لعنت کو ختم کرنے میں اپنے تعاون کا یقین دلایا۔
واضح رہے کہ دہشت گردوں نے کچھ عرصے سے خیبر پختونخوا کو اپنے نشانے پر رکھا ہوا ہے اور مختلف کارروائیاں بھی کی ہیں جس کے جواب میں سیکیورٹی فورسز انتہائی متحرک ہیں اور خفیہ آپریشنز کی بنیاد پر دہشت گردوں کو نشانہ بنایا جا رہا ہے۔
پیر کے روز ہی ڈیرہ اسماعیل خان میں سیکیورٹی فورسز نے کارروائی کرتے ہوئے ٹی ٹی پی کے اہم کمانڈر کو ہلاک کر دیا جبکہ اتوار کے روز ڈی آئی خان میں ہی 2 دہشت گردوں کو ہلاک کیا گیا تھا۔